കൊച്ചി: ടാക്‌സി വാഹനങ്ങള്‍ രജിസ്‌ട്രേഷന്‍ സമയത്തു തന്നെ 15 വര്‍ഷത്തെ നികുതി ഒറ്റത്തവണയായി അടയ്ക്കണമെന്ന വ്യവസ്ഥക്കെതിരേയുള്ള ഹരജി ഹൈക്കോടതി തള്ളി. സ്വകാര്യ വാഹനങ്ങളെപ്പോലെ ടാക്‌സികളും 15 വര്‍ഷത്തെ നികുതി അടയ്ക്കണമെന്ന വ്യവസ്ഥ 2014 ലെ ധനകാര്യ ബില്ലില്‍ ഉള്‍പ്പെടുത്തിയാണ് സര്‍ക്കാര്‍ കൊണ്ടുവന്നത്.
ഇതിനെ ചോദ്യം ചെയ്ത് കേരള ട്രാവല്‍ ഓപ്പറേറ്റേഴ്‌സ് അസോസിയേഷന്‍ ഉള്‍പ്പെടെ നല്‍കിയ ഹരജിയാണ് ഹൈക്കോടതി തള്ളിയത്. സ്വകാര്യ വാഹനങ്ങള്‍ക്കും ടാക്‌സി വാഹനങ്ങള്‍ക്കും വിവിധ നിരക്കിലാണ് നികുതി ചുമത്തിയിട്ടുള്ളതെന്നിരിക്കെ ഒറ്റത്തവണ നികുതി ഒരേ പോലെ നടപ്പാക്കിയതു ശരിയല്ലെന്നായിരുന്നു ഹരജിക്കാരുടെ വാദം.
എന്നാല്‍ കേന്ദ്ര മോട്ടോര്‍ വാഹന നിയമപ്രകാരമാണ് ഒറ്റത്തവണ നികുതി ഈടാക്കുന്നതെന്നും കേന്ദ്ര നിയമം നടപ്പാക്കാന്‍ സര്‍ക്കാര്‍ ബാധ്യസ്ഥമാണെന്നും സംസ്ഥാന സര്‍ക്കാര്‍ വിശദീകരിച്ചു. ഈ വാദം അംഗീകരിച്ചാണ് ഹൈക്കോടതി ഹരജി തള്ളിയത്.