തിരുരങ്ങാടി: വാഹന പരിശോധനയ്ക്കിടെ എം.വി.ഐയുടെ കൃത്യനിര്‍വഹണം തടസപ്പെടുത്തി അസഭ്യം പറഞ്ഞെന്ന പരാതിയില്‍ ഏഴുപേരെ തിരൂരങ്ങാടി പൊലിസ് അറസ്റ്റ് ചെയ്തു.
പന്താരങ്ങാടി സ്വദേശികളായ കുന്നുമ്മല്‍ ഇസ്മായീല്‍(43), തോട്ടുങ്ങല്‍ മുഹമ്മദ് റഫീഖ് (44), കൊടുങ്ങാട്ട് അബൂബക്കര്‍സിദ്ദീഖ് (34), പാലക്കപ്പറമ്പന്‍ നിസാര്‍ (30), തൃക്കുളം പാലത്തിങ്ങല്‍ സ്വദേശി മേലേപ്പുറത്ത് ഷാജന്‍ എന്ന മാകു(41), ഉള്ളണം കരിങ്കല്ലത്താണി സ്വദേശി നമ്പിശ്ശേരി മുജീബ് റഹ്മാന്‍ (39), തൃക്കുളം പള്ളിപ്പടി സ്വദേശി കുട്ടശ്ശേരി മുഹമ്മദ് മുസ്തഫ (34) എന്നിവരെയാണ് അറസ്റ്റ് ചെയ്തത്. 22ന് വൈകിട്ട് മൂന്നിന് തൃക്കുളം പതിനാറുങ്ങലാണ് സംഭവം. തിരൂരങ്ങാടി എം.വി.ഐ അബ്ദുല്‍ കരീമിന്റെ നേതൃത്വത്തില്‍ ചെമ്മാട് പരപ്പനങ്ങാടി റൂട്ടില്‍ പരിശോധനക്കിടെ ട്രക്കര്‍ ഡ്രൈവര്‍മാര്‍വാര്‍ വാഹനം തടയുകയും അസഭ്യം പറയുകയുമായിരുന്നു എന്നാണ് എം.വി.ഐ നല്‍കിയ പരാതി. പ്രതികളെ പരപ്പനങ്ങാടി കോടതി റിമാന്റ് ചെയ്തു.