കൊച്ചി: വിവാദങ്ങള്‍ക്കിടെ വീണ്ടും വാര്‍ത്താസമ്മേളനം നടത്താന്‍ പി.വി അന്‍വര്‍ എം.എല്‍.എ. ഇന്ന് വൈകിട്ട് നാലരയ്ക്ക് മാധ്യങ്ങളെ കാണുമെന്ന് പി.വി അന്‍വര്‍ ഫേസ്ബുക്ക് കുറിപ്പിലൂടെ അറിയിച്ചു.

വിശ്വാസങ്ങള്‍ക്കും വിധേയത്വത്തിനും താല്‍ക്കാലികതക്കും അപ്പുറം ഓരോ മനുഷ്യനിലും ഉള്ള ഒന്നാണു ആത്മാഭിമാനം. അതിത്തിരി കൂടുതലുണ്ട്. നീതിയില്ലെങ്കില്‍ നീ തീയാവുക എന്നാണല്ലോ.. വൈകിട്ട് നാലരയ്ക്ക് മാധ്യമങ്ങളെ കാണും- ഇങ്ങനെയായിരുന്നു കുറിപ്പ്. 

സി.പി.എമ്മിനെയും സര്‍ക്കാരിനെയും മുള്‍മുനയില്‍ നിര്‍ത്തുന്ന തരത്തിലുള്ള ആരോപണങ്ങള്‍ നിരന്തരം ഉന്നയിച്ചതിനു പിന്നാലെയാണ് അന്‍വര്‍ വാര്‍ത്താസമ്മേളനം വീണ്ടും വിളിച്ചിരിക്കുന്നത്. 

എ.ഡി.ജി.പി എം.ആര്‍ അജിത് കുമാറിനെ സര്‍വിസില്‍ നിന്ന് പിരിച്ചുവിടണമെന്ന് പി.വി അന്‍വര്‍ എം.എല്‍.എ ഇന്നലെയും ആവശ്യപ്പെട്ടിരുന്നു. എ.ഡി.ജി.പി കുപ്രസിദ്ധ ക്രിമിനലാണെന്നും അദ്ദേഹം പൊലിസ് സേനക്ക് യോജിച്ചയാളല്ലെന്നും അന്‍വര്‍ പറഞ്ഞു. എ.ഡി.ജി.പി ആര്‍.എസ്.എസുമായി കൂടിക്കാഴ്ച നടത്തിയത് പൂരത്തിന് വേണ്ടി മാത്രമല്ല. ഇവര്‍ തമ്മില്‍ പലതവണ കണ്ടിട്ടുണ്ടാകും. ആര്‍.എസ്.എസിന്റെ അജണ്ടയാണ് എ.ഡി.ജി.പി നടപ്പാക്കുന്നത്. പൂരം കലക്കിയത് അജിത് കുമാറാണ്. അദ്ദേഹത്തെ കൊണ്ട് അത് ചെയ്യിച്ചത് ആര്‍.എസ്.എസ് ആണ്. ഇക്കാര്യത്തില്‍ നടപടി വേണമോയെന്ന് സര്‍ക്കാര്‍ തീരുമാനിക്കട്ടെ.എ.ഡി.ജി.പി-ആര്‍.എസ്.എസ് കൂടിക്കാഴ്ച പകല്‍ പോലെ വ്യക്തമാണെന്നിരിക്കെ ഇക്കാര്യത്തില്‍ ഇനിയും അന്വേഷണം ആവശ്യമാണെന്നത് 2024 ലെ ഏറ്റവും വലിയ തമാശയാണെന്നും അന്‍വര്‍ പരിഹസിച്ചു. എല്ലാവര്‍ക്കും അറിവുള്ള കാര്യങ്ങള്‍ മുഖ്യമന്ത്രി ഉള്‍പ്പെടെയുള്ളവര്‍ക്ക് ഇതുവരെ ബോധ്യപ്പെടാത്തത് എന്തുകൊണ്ടെന്ന് അറിയില്ലെന്നും ചില കാര്യങ്ങള്‍ ചിലര്‍ക്ക് ബോധ്യപ്പെടാന്‍ സമയമെടുക്കുമെന്നും അന്‍വര്‍ പറഞ്ഞു.