മഞ്ചേരി: മഞ്ചേരി നഗരത്തിന്റെ വിവിധ ഭാഗങ്ങളില്‍ എക്‌സൈസ് സംഘം നടത്തിയ പരിശോധനയില്‍ അഞ്ചുപേരെ കഞ്ചാവു സഹിതം പിടികൂടി. 200 ഗ്രാം കഞ്ചാവ് സഹിതം പുല്‍പ്പറ്റ തൃപ്പനച്ചി കുന്നുംപുറം വീട്ടില്‍ സുരേഷ് (37), 50 ഗ്രാം കഞ്ചാവ് സഹിതം പന്തല്ലൂര്‍ കിടങ്ങയം കരിമ്പുഴ വീട്ടില്‍ അബ്ദുല്‍ റഊഫ് (27), 40 ഗ്രാം കഞ്ചാവ് സഹിതം പെരിന്തല്‍ നെന്മിനി തൊണ്ടിപ്പറമ്പ് കരിമ്പുഴ വീട്ടില്‍ ശിവദാസ് (35), 50 ഗ്രാം കഞ്ചാവുമായി പെരിന്തല്‍മണ്ണ നെന്മിനി തൊണ്ടിപ്പറമ്പില്‍ കുന്നുമ്മല്‍ വീട്ടില്‍ ഷെമില്‍ (25), 400 ഗ്രാം കഞ്ചാവ് സഹിതം മൊറയൂര്‍ ചാലില്‍തൊടി വീട്ടില്‍ അബ്ദുല്‍ ഖാദര്‍ (46) എന്നിവരെയാണ് എക്‌സൈസ് വകുപ്പ് അറസ്റ്റ് ചെയ്തത്. പ്രതികളെ മഞ്ചേരി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി മുന്‍പാകെ ഹാജരാക്കി റിമാന്‍ഡ് ചെയ്തു.
നഗരത്തിലും പരിസരപ്രദേശങ്ങളിലും എക്‌സൈസ് പരിശോധന ശക്തമാക്കിയിട്ടുണ്ട്. അനധികൃതമായി വിദേശമദ്യം കൈവശംവച്ച എട്ടുപേരെയും എക്‌സൈസ് സംഘം ഇക്കഴിഞ്ഞ ദിവസം പിടികൂടിയിരുന്നു. മുട്ടിങ്ങല്‍ മുഹമ്മദലി, നാലുവീട്ടില്‍ പ്രദീപ്, കുമ്മിനാട് രാമകൃഷ്ണന്‍, പാപ്പറ്റ മോഹന്‍, അന്‍വര്‍ പറമ്പാടന്‍, കണ്ണത്ത് ഉണ്ണികൃഷ്ണന്‍, മഠത്തില്‍പുറായി ഷാഫി, ചിലമ്പിലക്കയ്യില്‍ അബ്ദുല്‍സലാം എന്നിവരാണ് അറസ്റ്റിലായിരുന്നത്. ഇവരില്‍ നിന്ന് 33.4 ലിറ്റര്‍ വിദേശ മദ്യത്തോടൊപ്പം രണ്ട് ബൈക്കുകളും ഒരു സ്‌കൂട്ടറും കസ്റ്റഡിയിലെടുത്തു.
എക്‌സൈസ് സര്‍ക്കിള്‍ ഇന്‍സ്‌പെക്ടര്‍ പി.കെ ഹരികുമാറിന്റെ നേതൃത്വത്തില്‍ എക്‌സൈസ് ഇന്‍സ്‌പെക്ടര്‍ എസ്. സുരേഷ് കുമാര്‍, പ്രിവന്റീവ് ഓഫിസര്‍മാരായ വി. രാധാകൃഷ്ണന്‍, കുഞ്ഞാലന്‍ കുട്ടി, ജോര്‍ജ് തോമസ്, സിവില്‍ എക്‌സൈസ് ഓഫിസര്‍മാരായ എം.കെ ബാലകൃഷ്ണന്‍, ജയപ്രകാശ്, വിനില്‍ കുമാര്‍, സുരേന്ദ്രന്‍, ശശീന്ദ്രന്‍ എന്നിവരടങ്ങിയ സംഘമാണ് പ്രതികളെ പിടികൂടിയത്.