പട്ടിക്കാട്: വര്‍ഷങ്ങള്‍ക്ക് മുന്‍പ് തകര്‍ന്ന ഓവുപാലം നന്നാക്കാത്തത് കീഴാറ്റൂര്‍ വടക്കുംതല നിവാസികളെ ദുരിതത്തിലാക്കുന്നു. വടക്കുംതല എല്‍.പി സ്‌കൂള്‍ റോഡിലെ ഓവുപാലമാണ് രണ്ടുവര്‍ഷം മുന്‍പ് തകര്‍ന്നത്.
പാറക്കുഴി പള്ളിക്കടവ് പാതയില്‍ നിന്നും മണിയാണീരിക്കടവ് ആലിക്കപറമ്പ് പാതയുമായി ബന്ധിപ്പിക്കുന്ന റോഡ് ഒന്നര പതിറ്റാണ്ട് മുന്‍പാണ് നിര്‍മിച്ചത്.
പാതയിലെ വയലിനോട് ചേര്‍ന്ന് നിര്‍മിച്ച താല്‍ക്കാലിക ഓവുപാലം തകര്‍ന്നതോടെ ഇതിലൂടെയുള്ള ഗതാഗതം തടസപ്പെട്ടിരിക്കയാണ്.
മാത്രമല്ല വിദ്യാര്‍ഥികള്‍ ഉള്‍പ്പെടെ നിരവധി പേര്‍ സഞ്ചരിക്കുന്ന പാതകൂടിയാണിത്.
ഓവുപാല നിര്‍മാണത്തിന് ഫണ്ട് അനുവദിക്കാമെന്ന് അധികൃതര്‍ വാഗ്ദാനം നല്‍കിയെങ്കിലും ഇതുവരെ യാതൊരു നടപടിയുമായിട്ടില്ലെന്ന് നാട്ടുകാര്‍ പറയുന്നു.
ഈ മഴക്കാലത്തിനു മുന്‍പെങ്കിലും ഓവുപാലം നിര്‍മിക്കാന്‍ നടപടിയുണ്ടാകണമെന്നാണ് നാട്ടുകാരുടെ ആവശ്യം.