കുമ്പള: ആരിക്കാടിയില്‍ മിനി സ്റ്റേഡിയം ഒരുക്കി വാട്‌സ് ആപ്പ് കൂട്ടായ്മ . 'ഹെല്‍പ് ലൈന്‍' വാട്ട്‌സ് ആപ്പ് കൂട്ടായ്മയാണ് നാട്ടുകാരുടെ ചിരകാല അഭിലാഷമായ മിനി സ്റ്റേഡിയം സാക്ഷാത്കരിക്കുന്നതിന് രംഗത്തെത്തിയിട്ടുള്ളത്.
ആരിക്കാടി എ.യു.പി സ്‌കൂളിനു പടിഞ്ഞാര്‍ വശം പുഴയോട് ചേര്‍ന്നു കിടക്കുന്ന പതിനഞ്ചേക്കര്‍ ഭൂമിയാണ് പുല്‍മാട്. ഈ മൈതാനമാണ് മിനിസ്റ്റേഡിയമാക്കി മാറ്റാന്‍ ഉദ്ദേശിക്കുന്നത്. പുല്‍മാടിനെ മിനി സ്റ്റേഡിയമാക്കണമെന്ന നാട്ടുകാരുടെ കാലങ്ങളായുള്ള ആവശ്യത്തിന് ബന്ധപ്പെട്ട അധികാരികള്‍ വേണ്ട നടപടികള്‍ കൈകൊള്ളാത്തതിനാലാണ് ഹെല്‍പ്പ് ലൈന്‍ വാട്‌സ്ആപ്പ് കൂട്ടായ്മ മിനി സ്റ്റേഡിയം നിര്‍മാണത്തിന് മുന്നിട്ടിറങ്ങിയത്.
നാട്ടുകാരുടെ സഹകരണത്തോടെ ഫണ്ട് സ്വരൂപിച്ച് മിനി സ്റ്റേഡിയത്തിന്റെ പ്രാരംഭ ജോലികള്‍ കഴിഞ്ഞ ദിവസം ആരംഭിച്ചു. ആദ്യഘട്ടത്തില്‍ 10 ലക്ഷം രൂപയാണ് ചെലവ് പ്രതീക്ഷിക്കുന്നത്. ഇതിനെ ജില്ലയിലെ തന്നെ ഏറ്റവും മികച്ച സ്റ്റേഡിയം ആക്കി മാറ്റാന്‍ കഴിയുമെന്ന് നാട്ടുകാര്‍ പറയുന്നു.
പ്രാരംഭ പണികള്‍ പൂര്‍ത്തിയാകുന്നതോടെ സ്‌പോര്‍ട്‌സ് അക്കാദമിയുടെയോ ഇതര സര്‍ക്കാര്‍ സംരംഭങ്ങളുടെയോ സഹായത്തോടെ മിനി സ്റ്റേഡിയം പൂര്‍ത്തീകരിക്കാനുള്ള പദ്ധതിയാണ് ഈ കൂട്ടായ്മയുടെ ലക്ഷ്യം.