കൊല്ലം: കൊല്ലത്ത് യൂത്ത് കോണ്‍ഗ്രസ് പ്രവര്‍ത്തകര്‍ തുറന്ന സമൂഹ അടുക്കള അടപ്പിച്ച പൊലിസ് നടപടി ചോദ്യം ചെയ്തുള്ള ഹരജി ഹൈക്കോടതി തീര്‍പ്പാക്കി. സമൂഹ അടുക്കള നടത്തുന്നതിന് ചില നടപടിക്രമങ്ങളുണ്ടെന്നും സമാന്തരമായി നടത്തിവന്ന യൂത്ത് കോണ്‍ഗ്രസിന്റെ സമൂഹ അടുക്കളയില്‍ ആള്‍ക്കൂട്ടമായിരുന്നെന്നും സര്‍ക്കാര്‍ കഴിഞ്ഞ ദിവസം കോടതിയെ അറിയിച്ചിരുന്നു.
യൂത്ത് കോണ്‍ഗ്രസ് പ്രവര്‍ത്തകരായ ഹരജിക്കാരെ കൂടി സമൂഹ അടുക്കള പ്രവര്‍ത്തനങ്ങളില്‍ പങ്കാളികളാക്കണമെന്ന് കോടതി നിര്‍ദേശിച്ചു. ഹരജിക്കാരുടെ കൈവശമുള്ള അവശ്യവസ്തുക്കള്‍ ജില്ലാ സപ്ലൈ ഓഫിസര്‍ക്ക് കൈമാറണമെന്നും കോടതി നിര്‍ദേശിച്ചിട്ടുണ്ട്. കഴിഞ്ഞ ദിവസമാണ് കൊല്ലത്ത് യൂത്ത് കോണ്‍ഗ്രസ് ഒരുക്കിയ സമൂഹ അടുക്കള പൊലിസ് അടപ്പിച്ചത്. ഇതിനെതിരേ യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി എന്‍ ഫൈസല്‍, കൊല്ലം ജില്ലാ പ്രസിഡന്റ് അരുണ്‍ രാജ് എന്നിവരാണ് ഹരജി സമര്‍പ്പിച്ചത്. സര്‍ക്കാര്‍ നടത്തുന്ന സമൂഹ അടുക്കളക്ക് സമാന്തരമായാണ് അടുക്കള നടത്തുന്നതെന്നും കൊവിഡ് പ്രോട്ടോക്കോള്‍ പാലിച്ചില്ലെന്നും ആരോപിച്ചാണ് പൊലിസ് സമൂഹ അടുക്കള അടപ്പിച്ചത്.