ന്യൂഡല്‍ഹി: എയര്‍ ഇന്ത്യ വിമാനത്തില്‍ എയര്‍ ഹോസ്റ്റസിനെ ശല്യം ചെയ്ത ബ്രിട്ടീഷുകാരായ രണ്ട് ഇന്ത്യന്‍ വംശജരെ പൊലിസ് അറസ്റ്റ് ചെയ്തു. ജസ്പല്‍ സിങ്(35), ചരണ്‍ ദീപ് കൈറ(36) എന്നിവരാണ് അറസ്റ്റിലായത്.

ലണ്ടനില്‍ നിന്ന് ന്യൂഡല്‍ഹിയിലേക്കുള്ള വിമാനത്തില്‍ മാര്‍ച്ച് 29നായിരുന്നു സംഭവം. ഇരുവരേയും പിന്നീട് ജാമ്യത്തില്‍ വിട്ടതായി ഡല്‍ഹി പൊലിസ് അറിയിച്ചു.

ജയ്പൂരിലെ ഒരു വിവാഹാഘോഷത്തില്‍ പങ്കെടുക്കാനെത്തിയതായിരുന്നു ഇവരെന്ന് ഡപ്യൂട്ടി കമ്മീഷണര്‍ സഞ്ജയ് ഭാട്ടിയ പറഞ്ഞു.

യാത്രക്കിടയില്‍ ഇരുവരും ഹോസ്റ്റസിനോട് ഭക്ഷണം ആവശ്യപ്പെട്ടു. ഭക്ഷണം എത്താന്‍ വൈകിയതാണ് പ്രശ്‌നങ്ങള്‍ക്കിടയാക്കിയത്. തുടര്‍ന്ന് ഇവര്‍ എയര്‍ ഹോസ്റ്റസിനോട് മോശമായ ഭാഷയില്‍ സംസാരിക്കുകയായിരുന്നു.

സംഭവത്തില്‍ എയര്‍ ഇന്ത്യ അപലപിച്ചു. മാന്യമായി പെരുമാറേണ്ടത് യാത്രക്കാരുടെ ഉത്തരവാദിത്തമാണ്. മികച്ച സേവനത്തിന് സഹകരണം ആവശ്യമാണെന്നും എയര്‍ഇന്ത്യ പത്രക്കുറിപ്പില്‍ അറിയിച്ചു.