പട്‌ന:ബിഹാറില്‍ വീണ്ടും മാര്‍ക്ക്ദാനം. 35 മാര്‍ക്കില്‍ നടത്തിയ പരീക്ഷയില്‍ ഒരു വിദ്യാര്‍ഥിക്ക് ലഭിച്ചത് 37 മാര്‍ക്ക്.
അര്‍വാള്‍ ജില്ലയില്‍ നിന്നുള്ള ഭീം കുമാര്‍ എന്ന വിദ്യാര്‍ഥിക്കാണ് കണക്ക് പരീക്ഷയില്‍ പരമാവധി മാര്‍ക്കിനേക്കാള്‍ ഉയര്‍ന്ന മാര്‍ക്ക് കിട്ടിയത്. കിഴക്കന്‍ ചമ്പാരനില്‍ നിന്നുള്ള സന്ദീപ് രാജിന് ഫിസിക്‌സ് പരീക്ഷയില്‍ 35ല്‍ 38 മാര്‍ക്കും ദര്‍ഭംഗയില്‍ നിന്നുള്ള രാഹുല്‍ കുമാറിന് കണക്ക് പരീക്ഷയില്‍ 35ല്‍ 40 മാര്‍ക്കും ലഭിച്ചു.
ചില പരീക്ഷകള്‍ എഴുതാത്ത വിദ്യാര്‍ഥികള്‍ക്കും റിസല്‍ട്ട് വന്നപ്പോള്‍ ഉയര്‍ന്ന മാര്‍ക്ക് ലഭിച്ചിട്ടുണ്ട്. വൈശാലിയില്‍ നിന്നുള്ള ജാന്‍വി സിങ് ജീവശാസ്ത്രം പരീക്ഷ എഴുതിയിട്ടേയില്ല. എന്നാല്‍ റിസല്‍ട്ട് വന്നപ്പോള്‍ അവള്‍ക്ക് 18 മാര്‍ക്ക് കിട്ടി. 2005 ല്‍ ബിഹാര്‍ ബോര്‍ഡിനു കീഴില്‍ പരീക്ഷ എഴുതിയ റൂബി റായി എന്ന വിദ്യാര്‍ഥി പൊളിറ്റിക്കല്‍ സയന്‍സ് എന്താണെന്നുള്ള ചോദ്യത്തിന് ഭക്ഷണത്തെക്കുറിച്ചുള്ള വിഷയം എന്നാണ് എഴുതിയത്. ആ വര്‍ഷത്തെ ഉന്നത വിജയം നേടിയ വിദ്യാര്‍ഥി അവളായിരുന്നു.
പരീക്ഷയിലെ ക്രമക്കേടുകള്‍ക്ക് പിന്നാലെ പരീക്ഷാഫലത്തിലും ഗുരുതരമായ പിഴവുകള്‍ സംഭവിച്ചിരിക്കുന്നത് ബിഹാര്‍ വിദ്യാഭ്യാസ വകുപ്പിനെ പ്രതിരോധത്തിലാക്കിയിരിക്കുകയാണ്.