മലപ്പുറം: തീരദേശ സമാധാനം പുനഃസ്ഥാപിക്കുന്നതിനു കൂട്ടായി, ഉണ്യാല്‍ എന്നിവിടങ്ങളില്‍ ഇന്നു യോഗം ചേരും. തീരദേശത്തു സമാധാനം പുനഃസ്ഥാപിക്കുന്നതിനു ജില്ലാ കലക്ടറുടെ ചേംബറില്‍ നടന്ന യോഗത്തിലെ തീരുമാനപ്രകാരമാണ് ഇന്നു മേഖലാ യോഗങ്ങള്‍ നടക്കുന്നത്.
വൈകിട്ട് മൂന്നിനു കൂട്ടായി ഹയാത്ത് ഓഡിറ്റോറിയത്തിലും നാലിന് ഉണ്യാലിലെ ഫിഷറീസ് സെന്ററിലുമാണ് യോഗങ്ങള്‍. പാണക്കാട് സയ്യിദ് സാദിഖലി ശിഹാബ് തങ്ങള്‍, പി.കെ കുഞ്ഞാലിക്കുട്ടി എം.പി, പാലോളി മുഹമ്മദ് കുട്ടി, അഡ്വ. യു.എ ലത്വീഫ്, ഇ.എന്‍ മോഹന്‍ദാസ് തുടങ്ങി മുസ്‌ലിം ലീഗിന്റെയും സി.പി.എമ്മിന്റെയും ജില്ലാ നേതാക്കളും ജില്ലാ കലക്ടര്‍ അമിത് മീണ, ജില്ലാ പൊലിസ് മേധാവി പ്രതീഷ് കുമാര്‍, ആര്‍.ഡി.ഒ, ഡിവൈ.എസ്.പി തുടങ്ങിയ റവന്യൂ, പൊലിസ് ഉദ്യോഗസ്ഥരും പങ്കെടുക്കും.
പ്രശ്‌നബാധിത പ്രദേശങ്ങളെ 16 ക്ലസ്റ്ററുകളാക്കി ഇരു പാര്‍ട്ടികളുടെയും പത്ത് അംഗങ്ങള്‍ അടങ്ങുന്ന കമ്മിറ്റിക്കു പൊലിസ്, റവന്യൂ ഉദ്യോഗസ്ഥരുടെ പങ്കാളിത്തത്തോടെ രൂപം നല്‍കും. തീരദേശത്തു സമാധാനം നിലനിര്‍ത്തുന്നതിനാവശ്യമായ പദ്ധതികള്‍ യോഗത്തില്‍ ആവിഷ്‌കരിക്കും.