കൊളംബൊ: 13.5 കിലോഗ്രാം ഹെറോയിന്‍ കടത്തിയെന്നാരോപിച്ച് ആറ് ഇന്ത്യക്കാരെ ശ്രീലങ്കന്‍ നാവിക സേന അറസ്റ്റ് ചെയ്തു. അന്താരാഷ്ട്ര സമുദ്രാതിര്‍ത്തിക്ക് സമീപത്തുവച്ചാണ് ഇവരെ അറസ്റ്റ് ചെയ്തത്. ഇന്ത്യന്‍ സമുദ്രാതിര്‍ത്തിയില്‍ നിന്ന് ശ്രീലങ്കന്‍ അതിര്‍ത്തിയിലേക്ക് കടക്കാന്‍ ശ്രമിച്ചവരെയാണ് അറസ്റ്റ് ചെയ്തതെന്ന് ശ്രീലങ്കന്‍ നാവികസേന പ്രസ്താവനയില്‍ പറഞ്ഞു. പട്രോളിങ് നടത്തുകയായിരുന്ന കപ്പലാണ് ഇവരെ പിടികൂടിയത്. മത്സ്യത്തൊഴിലാളികളെന്ന വ്യാജേന ബോട്ടില്‍ സഞ്ചരിച്ചവരെ നാവികസേന ഏറെ നേരം നീരീക്ഷിച്ചിരുന്നു. തുടര്‍ന്നാണ് ഇവരെയും ബോട്ടും കസ്റ്റഡിയിലെടുത്തതെന്ന് നാവിക സേനാ വക്താവ് ചാമിന്ദ വലകുലുംഗെ അറിയിച്ചു. കനകശാന്തുറൈ ഹാര്‍ബറിലേക്കാണ് ഇവര്‍ മയക്കുമരുന്നു കൊണ്ടുവന്നതെന്നും പ്രതികളെ കൂടുതല്‍ അന്വേഷണത്തിനായി പൊലിസിനു കൈമാറിയെന്നും അദ്ദേഹം പറഞ്ഞു.
2014ലും അഞ്ച് ഇന്ത്യന്‍ മത്സ്യത്തൊഴിലാളികളെ ശ്രീലങ്ക മയക്കുമരുന്ന് കടത്തുമായി ബന്ധപ്പെട്ട് അറസ്റ്റ് ചെയ്തിരുന്നു.