ന്യൂഡല്‍ഹി: ഡല്‍ഹി മുഖ്യമന്ത്രി അരവിന്ദ് കെജ്‌രിവാളിന്റെ സമരം ഇന്നലെയും തുടര്‍ന്നു. ഐ.എ.എസ് ഉദ്യോഗസ്ഥരുടെ നിസഹകരണത്തില്‍ നടപടിയെടുക്കണമെന്ന് ആവശ്യപ്പെട്ട് ലെഫ്റ്റനന്റ് ഗവര്‍ണറുടെ ഓഫിസിലാണ് കെജ്‌രിവാളും സംഘവും തിങ്കളാഴ്ച മുതല്‍ സമരം ആരംഭിച്ചത്. ബി.ജെ.പിയില്‍നിന്നു രാജിവച്ച മുന്‍ കേന്ദ്രമന്ത്രി യശ്വന്ത് സിന്‍ഹയും സമരത്തിന് പിന്തുണ പ്രഖ്യാപിച്ച് ഇവിടേക്ക് എത്തിയിട്ടുണ്ട്. അതേസമയം ഞായറാഴ്ചയ്ക്കകം പ്രശ്‌നത്തിന് പരിഹാരം കണ്ടില്ലെങ്കില്‍ പ്രധാനമന്ത്രിയുടെ ഓഫിസിലേക്ക് മാര്‍ച്ച് നടത്തുമെന്ന് ആം ആദ്മി രാജ്യസഭാംഗം സഞ്ജയ് സിങ് അറിയിച്ചു.
അതിനിടെ താന്‍ നടത്തുന്ന സമരം പൊതുസേവനം നഷ്ടപ്പെട്ട ഡല്‍ഹിയിലെ ജനങ്ങള്‍ക്ക് വേണ്ടിയാണെന്ന് കെജ്‌രിവാള്‍ പറഞ്ഞു. തന്റെ സര്‍ജിക്കല്‍ സ്‌ട്രൈക്കാണ് സമരമെന്നും അദ്ദേഹം കൂട്ടിച്ചേര്‍ത്തു. തിങ്കളാഴ്ച ലെഫ്റ്റനന്റ് ഗവര്‍ണര്‍ അനില്‍ ബൈജാലിനെ കെജ്‌രിവാളിന്റെ നേതൃത്വത്തിലുള്ള സംഘം സന്ദര്‍ശിച്ചത്.
അനുകൂല നിലപാട് ലഭിക്കാത്തതിനാല്‍ കൂടിക്കാഴ്ചയ്ക്ക് ശേഷം മുഖ്യമന്ത്രിയും മന്ത്രിമാരും പ്രതിഷേധിച്ച് സന്ദര്‍ശകമുറിയില്‍ ഇരുന്ന് സമരം ചെയ്യുകയായിരുന്നു. എന്നാല്‍ പ്രതിഷേധക്കാരെ കാണാന്‍പോലും ലെഫ്.ഗവര്‍ണര്‍ തയാറായില്ല.