തൊടുപുഴ: ബൈക്ക് യാത്രക്കിടയില്‍ വിദ്യാര്‍ഥിക്ക് സൂര്യാഘാതമേറ്റു. വെങ്ങല്ലൂര്‍ കരിക്കംപറമ്പില്‍ അസീസിന്റെ മകന്‍ മുഹമ്മദ് റസല്‍ (22) നാണ് സൂര്യാഘാതമേറ്റത്. മംഗലാപുരത്ത് എം.ബി.എ വിദ്യാര്‍ഥിയായ റസല്‍ അവധിക്ക് നാട്ടിലെത്തിയതായിരുന്നു.
ബുധനാഴ്ച പകല്‍ വീട്ടാവശ്യത്തിനായി ഏറെ നേരം തൊടുപുഴ ടൗണിലൂടെ ബൈക്ക് യാത്ര നടത്തിയിരുന്നു. ഉച്ചകഴിഞ്ഞപ്പോള്‍ കഴുത്തിന്റെ പിന്‍ഭാഗത്ത് കുമിളകള്‍ രൂപപ്പെടുകയും പൊള്ളുകയും ചെയ്തതോടെ ആശുപത്രിയില്‍ ചികിത്സ തേടുകയായിരുന്നു. സൂര്യതാപമേറ്റതാണെന്ന് ഡോക്ടര്‍ സ്ഥിരീകരിച്ചു. തുടര്‍ന്ന് മരുന്നും വിശ്രമവും നിര്‍ദ്ദേശിക്കുകയായിരുന്നു. ബുധനാഴ്ച ഉച്ചയ്ക്ക് 37 ഡിഗ്രിയായിരുന്നു തൊടുപുഴയിലെ താപനില.