ലാഹോര്‍: ഇന്ത്യയുടെയും പാകിസ്താന്റെയും ഇടയില്‍ സംഘര്‍ഷം രൂക്ഷമായതോടെ സംഝോത എക്‌സ്പ്രസിന്റെ സര്‍വിസ് പാകിസ്താന്‍ നിര്‍ത്തി. ഇതോടെ അട്ടാരിയിലേക്ക് പുറപ്പെട്ട യാത്രക്കാര്‍ ലാഹോര്‍ റെയില്‍വേ സ്റ്റേഷനില്‍ കുടുങ്ങി. ഒരു അറിയിപ്പുണ്ടാകുന്നതുവരെ സംത്സോത എക്‌സ്പ്രസിന്റെ രണ്ടാഴ്ചയിലൊരിക്കലുള്ള സര്‍വിസ് നിര്‍ത്തിയതായി റെയില്‍വേ അധികൃതര്‍ അറിയിച്ചെന്ന് പാക് മാധ്യമമായ ഡോണ്‍ റിപ്പോര്‍ട്ട് ചെയ്തു.

ബുധനാഴ്ച രാത്രി ഡല്‍ഹിയില്‍നിന്നു പുറപ്പെട്ട സംത്സോത പാകിസ്താന്‍ സര്‍വിസ് അവസാനിപ്പിച്ചതിനെ തുടര്‍ന്നു നിലവില്‍ അട്ടാരിയിലെ കസ്റ്റം പോയിന്റിലാണ്. സാഹചര്യങ്ങള്‍ സൂക്ഷ്മമായി നിരീക്ഷിക്കുകയാണെന്നും യാത്രക്കാര്‍ക്ക് വാഗാ അതിര്‍ത്തി വഴി ബസിലും മറ്റു മാര്‍ഗങ്ങളിലൂടെയും രാജ്യത്തേക്കു തിരിച്ചെത്താമെന്നും ഇന്ത്യന്‍ അധികൃതര്‍ പറഞ്ഞു.
ഇന്ത്യന്‍ സംത്സോത എക്‌സ്പ്രസിന്റെ ഏറ്റവും അവസാനത്തെ സ്റ്റോപ്പാണ് പഞ്ചാബിലെ അമൃത്‌സര്‍ ജില്ലയിലെ അട്ടാരി. ഇവിടെനിന്ന് പാകിസ്താന്റെ സംത്സോതയിലാണു യാത്ര തുടരേണ്ടത്.