ആര്‍പ്പൂക്കര: കര്‍ഷകര്‍ക്കെതിരേ ബാങ്കുകള്‍ സ്വീകരിക്കുന്ന ജപ്തി നടപടിയില്‍ പ്രതിഷേധിച്ച് കര്‍ഷകര്‍ ആത്മഹത്യ ചെയ്യുന്നത് അവസാനിപ്പിക്കാന്‍ സര്‍ക്കാര്‍ അടിയന്തരമായി ഇടപെടണമെന്ന് മുന്‍ മുഖ്യമന്ത്രി ഉമ്മന്‍ ചാണ്ടി ആവശ്യപ്പെട്ടു. കടക്കെണിമൂലം സംസ്ഥാനത്ത് നിരവധി കര്‍ഷകര്‍ ആത്മഹത്യ ചെയ്തിട്ടും ആവശ്യമായ നടപടി സ്വീകരിക്കാന്‍ സര്‍ക്കാര്‍ തയാറാവുന്നില്ല. ബാങ്കുകളുടെ ജപ്തി നോട്ടിസ് ലഭിച്ചതിനെ തുടര്‍ന്ന് ആത്മഹത്യക്ക് ശ്രമിച്ച് മെഡിക്കല്‍ കോളജ് ആശുപത്രിയില്‍ ചികിത്സയില്‍ കഴിയുന്ന ക്ഷീരകര്‍ഷകന്‍ അമയന്നൂര്‍, പാലമൂട് പി.എന്‍ വിനോദ് കുമാറിനെ (51) സന്ദര്‍ശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. കേരളത്തില്‍ 10 കര്‍ഷകര്‍ കടക്കെണിമൂലം ഇതുവരെ ആത്മഹത്യ ചെയ്തിട്ടുണ്ടെന്ന് ഉമ്മന്‍ചാണ്ടി പറഞ്ഞു. നിരുത്തരവാദപരമായ സമീപനം മാറ്റി ബാങ്ക് അധികൃതരുമായി അടിയന്തരമായി ചര്‍ച്ച ചെയ്ത് സര്‍ക്കാര്‍ പ്രശ്‌നം പരിഹരിക്കണമെന്നും ഉമ്മന്‍ചാണ്ടി ആവശ്യപ്പെട്ടു.

ആത്മഹത്യ ചെയ്ത വിവരം ശ്രദ്ധയില്‍പ്പെട്ടില്ലെന്ന മന്ത്രി എ.കെ ബാലന്റെ പ്രസ്താവനയെക്കുറിച്ചുള്ള ചോദ്യത്തിന് താന്‍ അതിന് മറുപടി പറയില്ലെന്നും പ്രശ്‌ന പരിഹാരമാണ് വേണ്ടതെന്നും അദ്ദേഹം പറഞ്ഞു. 40,000 രൂപ സര്‍ക്കാര്‍ നല്‍കാമെന്ന് പറഞ്ഞെങ്കിലും 3000 രൂപ മാത്രമാണ് കിട്ടിയതെന്നുമാണ് കലക്ടറില്‍ നിന്ന് അറിയാന്‍ കഴിഞ്ഞതെന്നും വിനോദിനെ സഹായിക്കുന്നതിനാവശ്യമായ നടപടി സ്വീകരിക്കുവാന്‍ ജില്ലാ കലക്ടറോട് ആവശ്യപ്പെട്ടിട്ടുണ്ടെന്നും ഉമ്മന്‍ചാണ്ടി വ്യക്തമാക്കി.