കുന്നുംകൈ: ബിവറേജസിന്റെ വെള്ളരിക്കുണ്ടിലെ ഔട്ട്‌ലെറ്റില്‍ വന്‍ തീപിടിത്തം. ഞായറാഴ്ച അര്‍ധരാത്രിയിലാണ് ബിവറേജസ് ഔട്ട്‌ലെറ്റില്‍ തീപടര്‍ന്നത്. വഴി യാത്രക്കാര്‍ കെട്ടിടത്തില്‍നിന്ന് പുക ഉയരുന്നത് കണ്ട് അധികൃതരെ വിവരമറിയിക്കുകയായിരുനു. കെട്ടിടം പൂര്‍ണമായും കത്തി നശിച്ചു. കാഞ്ഞങ്ങാട്ടുനിന്ന് ഒന്നും പെരിങ്ങോത്തുനിന്ന് രണ്ടും യൂനിറ്റ് അഗ്‌നിശമനസേനയെത്തിയാണ് തീയണച്ചത്. ലക്ഷങ്ങളുടെ നഷ്ടമുണ്ടായതായാണ് കണക്കാക്കുന്നത്. ഷോര്‍ട്ട് സര്‍ക്യൂട്ടാണ് അപകട കാരണമെന്നാണ് പ്രാഥമിക നിഗമനം.  1152 കുപ്പി വിദേശ മദ്യമാണ് തീപിടിത്തത്തില്‍ നശിച്ചത്. വെള്ളരിക്കുണ്ട് ടൗണിനടുത്ത് സ്വകാര്യ വ്യക്തിയുടെ കെട്ടിടത്തിലാണ് ബിവറേജസ് ഔട്ട്‌ലെറ്റ് പ്രവര്‍ത്തിച്ചു വരുന്നത്. ഷോര്‍ട്ട് സര്‍ക്യൂട്ട് കാരണമാണോ തീപിടിത്തമുണ്ടായതെന്ന് ഇലക്ട്രിക് വിഭാഗം പരിശോധന നടത്തിയാല്‍ മാത്രമേ സ്ഥിരീകരിക്കാനാവൂ എന്ന് അധികൃതര്‍ പറഞ്ഞു. ഇന്ന് ഫോറന്‍സിക് വിഭാഗം പരിശോധന നടത്തും. കെട്ടിടം പൂര്‍ണമായും കത്തിനശിച്ചതിനാല്‍ ഫിംഗര്‍ പ്രിന്റ് പരിശോധന അസാധ്യമാണ്. എല്ലാ പരിശോധനയും കഴിഞ്ഞാലെ യഥാര്‍ഥ നഷ്ടം കണക്കാക്കാന്‍ സാധ്യമാകൂവന്നും അധികൃതര്‍ പറഞ്ഞു.
സംഭവത്തില്‍ വെള്ളരിക്കുണ്ട് പൊലിസ് കേസ് രജിസ്റ്റര്‍ ചെയ്തു. എക്‌സൈസ് കമ്മിഷണര്‍ മോഹനന്‍ കുമാര്‍, നിലേശ്വരം റേഞ്ച് എക്‌സൈസ് ഇന്‍സ്‌പെക്ടര്‍ എം. രാമചന്ദ്രന്‍, അസി. ഇന്‍സ്‌പെക്ടര്‍ കെ. രാജന്‍ എന്നിവര്‍ സ്ഥലം സന്ദര്‍ശിച്ചു.

24 ലക്ഷം രൂപ ലോക്കറില്‍ ഭദ്രം

തലേദിവസത്തെ വരുമാനം 24 ലക്ഷം രൂപ ലോക്കറില്‍ സൂക്ഷിച്ചതിനാല്‍ തീപിടിച്ചില്ല. ഞായറാഴ്ചയിലെ കലക്ഷനാണ് ലോക്കറില്‍ സൂക്ഷിച്ചിരുന്നത്.