ന്യൂഡല്‍ഹി: വ്യോമാക്രമണം സംബന്ധിച്ച് റോയിട്ടേഴ്‌സ് പുറത്തു വിട്ട സാറ്റലൈറ്റ് ചിത്രങ്ങള്‍ പങ്കുവെച്ച് കോണ്‍ഗ്രസ് നേതാവ് ദിഗ് വിജയ് സിങ്. റോയിട്ടേഴ്‌സ് പുറത്തു വിട്ട ചിത്രവും വാര്‍ത്തയും അദ്ദേഹം തന്റെ ട്വിറ്ററില്‍ ഷെയര്‍ ചെയ്തിട്ടുണ്ട്.

വ്യോമാക്രമണത്തില്‍ അന്താരാഷ്ട്ര മാധ്യമങ്ങളുയര്‍ത്തുന്ന സംശയങ്ങള്‍ക്ക് പ്രധാനമന്ത്രി നരേന്ദ്ര മോദി വ്യക്തമായ മറുപടി നല്‍കണമെന്ന് നേരത്തെയും ദിഗ് വിജയ് സിങ് ആവശ്യപ്പെട്ടിരുന്നു. ആരാണ് കളവ് പറയുന്നതെന്ന് മനസ്സിലാക്കാന്‍ ജനങ്ങള്‍ക്ക് ആഗ്രഹമുണ്ട്. അതിനാല്‍ വ്യോമാക്രമണത്തെ കുറിച്ച് മോദി സംസാരിക്കണമെന്ന് അദ്ദേഹം ട്വീറ്റ് ചെയ്തു. കേന്ദ്ര സര്‍ക്കാറിന്റെ വിശ്വാസ്യതക്കു നേരെയാണ് ഇത്തരം സംശയങ്ങള്‍ വിരല്‍ ചൂണ്ടുന്നതെന്നും അദ്ദേഹം പറഞ്ഞിരുന്നു.

ബലാകോട്ടിലെ ജയ്‌ഷെ മുഹമ്മദിന്റെ പരിശീലനങ്ങള്‍ തകര്‍ത്തെന്ന കേന്ദ്ര സര്‍ക്കാറിന്റെ വാദത്തിന് വിരുദ്ധമായ ചിത്രം റോയിട്ടേഴ്‌സ് ആണ് പുറത്തു വിട്ടത്. ആക്രമണത്തില്‍ പരിശീലന കേന്ദ്രങ്ങള്‍ തകര്‍ന്നെന്നും 250ലേറെ ഭീകരര്‍ കൊല്ലപ്പെട്ടുമെന്നുമായിരുന്നു കേന്ദ്രത്തിന്റെ വാദം.

മാര്‍ച്ച് നാലിന് സാന്‍ഫ്രാന്‍സിസ്‌കോ കേന്ദ്രീകരിച്ചുള്ള സ്വകാര്യ സാറ്റലൈറ്റ് ഓപറേറ്ററായ പ്ലാനെറ്റ് ലാബിന്റെതാണ് ചിത്രങ്ങള്‍. വ്യോമാക്രമണം നടന്ന് ആറ് ദിവസത്തിന് ശേഷമുള്ള ചിത്രമാണിത്. ചിത്രത്തില്‍ കെട്ടിടങ്ങള്‍ വ്യക്തമായി കാണുന്നുണ്ട്.