പാലക്കാട്: മൂന്ന് ദിവസങ്ങളിലായി വനംവകുപ്പിനെയും നാട്ടുകാരുടെയും ഉറക്കം കെടുത്തുന്ന കാട്ടാനസംഘം ജനവാസമേഖലയിലിറങ്ങി. മുണ്ടൂര്‍, പുതുപ്പരിയാരം പഞ്ചായത്തുകള്‍ കടന്ന് രണ്ടംഗകാട്ടാന സംഘം ഇന്നലെ രാവിലെയോടെ പറളിപഞ്ചായത്ത് പരിധിയിലെത്തി. കല്‍പ്പാത്തി പുഴയുടെ തീരമായ പറളികടവിലാണ് കാട്ടാനകള്‍ നിലയുറപ്പിച്ചിരിക്കുന്നത്. വനം വകുപ്പും പൊലിസും പടക്കം എറിഞ്ഞ് ആനയെ ഓടിക്കാനുള്ള ശ്രമം തുടരുകയാണ്. സുരക്ഷിതത്വം ഉറപ്പാക്കുന്നതിന്റെ ഭാഗമായി പറളി പഞ്ചായത്തിലെ എല്ലാ വിദ്യാലയങ്ങള്‍ക്കും ഇന്നലെ അവധി പ്രഖ്യാപിച്ചു. കാട്ടാനകളെ കാണാനെത്തുന്ന ജനക്കൂട്ടത്തെയും പൊലിസ് നിയന്ത്രിക്കാന്‍ പാടുപെടുകയാണ്. പറളിക്കടവ് ഭാഗത്തുള്ള റോഡിലേക്കുള്ള വാഹനഗതാഗതവും പൊലിസ് നിയന്ത്രിച്ചു.
പറളി പുഴയില്‍ നിലയുറപ്പിച്ച ആനകളെ വനം വകുപ്പും പൊലിസും പടക്കം പൊട്ടിച്ചാണ് കരയിലേക്ക് കയറ്റിയത്. തുടര്‍ന്ന് ആനകള്‍ ചന്തപ്പുര ഭാഗത്തേക്ക് നീങ്ങിയിരിക്കുകയാണ്. വൈകിട്ടോടെ ആനകള്‍ കാട്ടിലേക്ക് മടങ്ങുമെന്നാണ് പ്രതീക്ഷ. മൂന്ന് മാസം മുന്‍പ് ഇതേ മേഖലയില്‍ കാട്ടാനകളിറങ്ങി മൂന്ന് ദിവസത്തോളം ആശങ്ക സൃഷ്ടിച്ചിരുന്നു. ആനകള്‍ ജനവാസ മേഖലയില്‍ തന്നെ തുടരുകയാണെങ്കില്‍ വിദഗ്ധ സംഘത്തെ എത്തിച്ച് കാടിലേക്ക് കയറ്റി വിടാനും ജില്ലാ ഭരണംകൂടം ആലോചിക്കുന്നുണ്ട്. ബുധനാഴ്ച വൈകീട്ട് മൂണ്ടുരില്‍ ചുമുട്ട് തൊഴിലാളിയെ ചവിട്ടി കൊന്ന കാട്ടാനകള്‍ വ്യാഴാഴ്ച റേഷന്‍കട തകര്‍ത്ത് ഉള്ളില്‍ കയറി അരി, ഗോതമ്പ് ചാക്കുകള്‍ പുറത്തെടുത്ത് തിന്ന ശേഷമാണ് പറളി ഭാഗത്തേക്ക് കടന്നത്. മൂന്ന് ദിവസമായി നാട്ടിലിറങ്ങി സൈ്വര ജീവിതം തകര്‍ക്കുന്ന കാട്ടാനകളെ കാട്ടിലേക്ക് കയറ്റാന്‍ സാധിക്കാത്ത വനംവകുപ്പിന്റെ നടപടിയില്‍ ജനരോഷവും വ്യാപകയായിരിക്കുകയാണ്. എന്നാല്‍ കാട്ടാനകളെ കയറ്റുന്നതിന് പരിമിതികളാണ് അലട്ടുന്നതെന്ന് വനം വകുപ്പ് പറയുന്നു. മയക്കുവെടി വെക്കുന്നതുള്‍പ്പെടെ നിയന്ത്രണങ്ങളാണുള്ളത്. ഓലപടക്കംമാത്രമാണ് ആനയെ തുരുത്തുന്നതിനുള്ള ആയുധം.ഇതാണ് കാട്ടാനകളെ കാട്ടിലേക്ക് കയറ്റുന്നതിനുള്ളതടസമെന്ന് വനം വകുപ്പ് ഉദ്യോഗസ്ഥര്‍ പറയുന്നു.