തിരുവമ്പാടി: തിരുവമ്പാടിയിലെ വിദേശ മദ്യശാലയില്‍ എത്തുന്നവരുടെ എണ്ണവും വാഹനങ്ങളുടെ എണ്ണവും അനുദിനം വര്‍ധിച്ചു വരുന്നത് നാട്ടുകാരുടെ പ്രതിഷേധത്തിന് ഇടയായതോടെ നടപടിയുമായി പൊലിസ് രംഗത്ത്. ഓരോ ദിവസം കഴിയുന്തോറും ഇവിടെ ജനത്തിരക്ക് ഉയരുകയാണ്. തിരുവമ്പാടി ചേപ്പിലം കോട് റോഡിന്റെ ഇരുവശങ്ങളിലും മദ്യം വാങ്ങാനെത്തുന്നവരുടെ വാഹനം നിര്‍ത്തിയിടുന്നത് ഇതുവഴി വരുന്ന വാഹനങ്ങള്‍ക്കും കാല്‍നടയാത്രക്കാര്‍ക്കും ബുദ്ധിമുട്ടുണ്ടാക്കുന്നു.ഇവിടെ ജനത്തിരക്ക് കൂടിയതും അനധികൃത വാഹന പാര്‍ക്കിങ് സാമൂഹ്യ ദ്രോഹികളുടെ വിളയാട്ടം തുടങ്ങിയ വിഷയങ്ങള്‍ 'സുപ്രഭാതം' കഴിഞ്ഞ ദിവസം റിപ്പോര്‍ട്ട് ചെയ്തിരുന്നു. ഗ്രാമ പഞ്ചായത്ത് ഇവിടെ സ്ഥാപിച്ച നോ പാര്‍ക്കിങ് ബോര്‍ഡുകളെല്ലാം സാമൂഹ്യ ദ്രോഹികള്‍ ഇളക്കി മാറ്റിയതായും നാട്ടുകാര്‍ പരാതിപെടുന്നു. ചേപ്പിലം കോട് റോഡില്‍ നിര്‍ത്തിയിട്ട വാഹനങ്ങളുടെ പുറത്ത് പൊലിസ് ഇന്നലെ സ്റ്റിക്കര്‍ പതിച്ചു.