തളിപ്പറമ്പ് (കണ്ണൂര്‍): കീഴാറ്റൂരില്‍ വര്‍ഷങ്ങളായി നെല്‍കൃഷി ഇല്ലെന്നു ദേശീയപാത അതോറിറ്റി റിപ്പോര്‍ട്ട് നല്‍കിയതില്‍ പ്രതിഷേധിച്ച് വയല്‍ക്കിളികള്‍ സമരത്തിനിറങ്ങുന്നു. വയല്‍ക്കിളി നേതാക്കള്‍ കഴിഞ്ഞവര്‍ഷം കേന്ദ്ര ഉപരിതല ഗതാഗത മന്ത്രി നിതിന്‍ ഗഡ്കരിയുമായി നടത്തിയ ചര്‍ച്ചയെ തുടര്‍ന്ന് കേന്ദ്രം നിയോഗിച്ച സമിതിയാണ് കീഴാറ്റൂര്‍ സന്ദര്‍ശിച്ച് റിപ്പോര്‍ട്ട് നല്‍കിയത്.

ദേശീയപാത അതോറിറ്റിയുടെ തിരുവനന്തപുരം റീജിണല്‍ ഓഫിസില്‍നിന്നുള്ള സംഘം നവംബര്‍ രണ്ടിനാണു റിപ്പോര്‍ട്ട് കേന്ദ്രമന്ത്രിക്കു കൈമാറിയത്. പ്രദേശത്ത് പരിശോധന നടത്തിയപ്പോള്‍ തീറ്റപ്പുല്‍ കൃഷിയാണു കാണാന്‍ സാധിച്ചതെന്ന റിപ്പോര്‍ട്ടിലെ പരാമര്‍ശങ്ങള്‍ വിവരാവകാശ നിയമപ്രകാരം വയല്‍ക്കിളി പ്രവര്‍ത്തകര്‍ ശേഖരിച്ചിരുന്നു.

കഴിഞ്ഞ കുറേ വര്‍ഷങ്ങളായി കീഴാറ്റൂര്‍ വയലില്‍ കൃഷി നടത്തിയതിനു കര്‍ഷകര്‍ കൃഷിഭവന്‍ മുഖേന കൈപ്പറ്റിയ ആനുകൂല്യങ്ങളുടെ വിവരങ്ങളും വയല്‍ക്കിളികള്‍ ശേഖരിച്ചിട്ടുണ്ട്. തെറ്റായ റിപ്പോര്‍ട്ടിനെതിരേ നിയമ നടപടി സ്വീകരിക്കുന്നതിനെക്കുറിച്ചും ഭാവി സമരപരിപാടികളെക്കുറിച്ചും ആലോചിക്കുന്നതിന് വയല്‍ക്കിളികള്‍ ഇന്ന് യോഗം ചേരും.