വടക്കാഞ്ചേരി: നഗരസഭയില്‍ ഭീതി പരത്തി വീണ്ടും മോഷണ സംഘം. പരുത്തിപ്രയില്‍ വീടിന്റെ മുന്‍വാതില്‍ കത്തിച്ച് മോഷണ ശ്രമം. വാതില്‍ ഭാഗികമായി കത്തി നശിച്ചു. അഗ്നി പടരുന്നതു കണ്ട് നാട്ടുകാര്‍ ഓടിയെത്തിയതോടെ മോഷ്ടാക്കള്‍ രക്ഷപ്പെട്ടു. ചണ്ടികുളം പരിസരത്തെ കിണറാമാക്കല്‍ സുലൈമാന്റെ വീട്ടിലാണ് കഴിഞ്ഞ രാത്രി 11 മണിയോടെ മോഷണ ശ്രമം നടന്നത്.
സുലൈമാനും, കുടുംബവും വര്‍ഷങ്ങളായി ഷാര്‍ജയിലാണ് താമസം. ജനവാസ മേഖലയിലെ വീട്ടിലെത്തിയ മോഷ്ടാക്കള്‍ വൈദ്യുതി ബന്ധം വിച്ഛേദിക്കുകയും, വീടിന് സമീപം കൂട്ടിയിട്ടിരുന്ന ചകിരിയും, വിറകും ഉപയോഗിച്ച് മുന്‍വാതില്‍ കത്തിക്കുകയുമായിരുന്നു.
തീ അതിവേഗം പടരാന്‍ ഡാല്‍ഡ ഉപയോഗിച്ചിരുന്നതായും കണ്ടെത്തി. രണ്ടംഗ സംഘമാണ് മോഷണത്തിനെത്തിയതെന്ന് ദൃക്‌സാക്ഷികള്‍ പറയുന്നു. അഗ്നിബാധ കണ്ട് ജനങ്ങള്‍ ഓടിയെത്തിയതോടെ മോഷ്ടാക്കള്‍ മതില്‍ ചാടി രക്ഷപ്പെട്ടു.
പൊലിസെത്തി നടത്തിയ പരിശോധനയില്‍ പ്രദേശത്ത് നിന്ന് കമ്പി പാരയും, ഉപയോഗിച്ച് തീരാത്ത ഡാല്‍ഡ പാക്കറ്റും കണ്ടെത്തി. അന്വേഷണം ആരംഭിച്ചതായി പൊലിസ് അറിയിച്ചു.