നാഗര്‍കോവില്‍: മോദി സര്‍ക്കാര്‍ കെട്ടിപ്പടുത്തത് കള്ളങ്ങളുടെ മുകളിലാണെന്ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. രാജ്യത്തിന്റെ കാവല്‍ക്കാരനെന്ന് സ്വയം വിശേഷിപ്പിച്ച് അധികാരത്തിലേറിയ പ്രധാനമന്ത്രി നരേന്ദ്ര മോദി പണക്കാരായ 15 കൂട്ടുകാര്‍ക്കായി 3.5 ലക്ഷം കോടിയാണ് നല്‍കിയത്.

സത്യം ജയിക്കുമെന്ന തിരുവള്ളുവരുടെ കവിത സത്യമാകുമെന്നും മോദി ജയിലിലാകുമെന്നും രാഹുല്‍ പറഞ്ഞു. നാഗര്‍കോവിലില്‍ സ്‌കോട് ക്രിസ്ത്യന്‍ കോളജ് മൈതാനത്ത് നടന്ന തെരഞ്ഞെടുപ്പു പ്രചാരണറാലിയില്‍ പ്രസംഗിക്കുകയായിരുന്നു അദ്ദേഹം.
റാഫേല്‍ വിമാനക്കരാറില്‍ അനില്‍ അംബാനിക്കു വേണ്ടി മോദി ഇടപെട്ടുവെന്ന് ഫ്രഞ്ച് പ്രസിഡന്റ് തന്നെ വെളിപ്പെടുത്തി.
സംസ്ഥാനങ്ങളെയും സ്ഥാപനങ്ങളെയും ഭീഷണിപ്പെടുത്തി വരുതിയിലാക്കാനാണ് ശ്രമം. ഓരോ വര്‍ഷവും രണ്ടു കോടി തൊഴില്‍ സൃഷ്ടിക്കുമെന്നു പറഞ്ഞ് അധികാരത്തിലേറിയ മോദി 45 വര്‍ഷത്തെ ഏറ്റവും രൂക്ഷമായ തൊഴിലില്ലായ്മയിലേയ്ക്കാണ് രാജ്യത്തെ നയിച്ചത്. ഇന്ത്യയെ പണക്കാരുടെയും പാവപ്പെട്ടവരുടെയും രണ്ട് രാജ്യങ്ങളാക്കി മാറ്റാനാണ് മോദി ശ്രമിച്ചതെന്നും രാഹുല്‍ ആരോപിച്ചു.

യു.പി.എ സര്‍ക്കാര്‍ അധികാരത്തിലെത്തിയാല്‍ സര്‍ക്കാര്‍ ജോലികളിലും ലോക്‌സഭയിലും രാജ്യസഭയിലും സ്ത്രീകള്‍ക്കു 33 ശതമാനം സംവരണം കൊണ്ടുവരുമെന്നും അദ്ദേഹം പറഞ്ഞു.