തിരുവനന്തപുരം: നിയമസഭയില്‍ കെ.എം മാണിയെ പിന്തുണച്ച് ഭരണപക്ഷത്ത് നിന്ന് എസ്. രാജേന്ദ്രനും, ഇ.എസ് ബിജിമോളും. മൂന്നാറിലെ എട്ടുവില്ലേജുകളില്‍ വീട് നിര്‍മാണത്തിനായി റവന്യു അധികാരികളുടെ എന്‍.ഒ.സി വേണമെന്ന സര്‍ക്കാര്‍ ഉത്തരവ് പിന്‍വലിക്കണമെന്നാവശ്യപ്പെട്ട് കെ.എം മാണി കൊണ്ടുവന്ന അടിയന്തരപ്രമേയ നോട്ടീസിനാണ് എസ്. രാജേന്ദ്രനും, ഇ.എസ് ബിജിമോളും പിന്തുണ നല്‍കിയത്.
ഇടുക്കിയിലെ ഭൂമി പ്രശ്‌നം ആയതിനാല്‍ അവിടെ നിന്നുള്ള എം.എല്‍.എമാര്‍ക്ക് സംസാരിക്കാനുള്ള അവസരം നല്കണമെന്ന ആവശ്യം സ്പീക്കര്‍ അംഗീകരിച്ചു. തുടര്‍ന്ന് ഇടുക്കി ജില്ലയില്‍ നിന്നുള്ള എം.എല്‍.എമാര്‍ ഭരണ-പ്രതിപക്ഷഭേദമില്ലാതെ എന്‍.ഒ.സി നിര്‍ദേശം പിന്‍വലിക്കണമെന്ന് ആവശ്യപ്പെടുകയായിരുന്നു.