തിരുവനന്തപുരം: കേരളത്തില്‍ നിന്നും സര്‍വിസ് നടത്തുന്ന മൂന്ന് ട്രെയിനുകളില്‍ ജനറല്‍ കോച്ചുകളിലെ സീറ്റ് വര്‍ധിപ്പിക്കുന്നു. ആത്യാധുനിക എല്‍.എച്ച്.ബി കോച്ചുകള്‍ ഈ ട്രെയിനുകള്‍ ഘടിപ്പിക്കും. എറണാകുളം-ഓഖ-എറണാകുളം എക്‌സ്പ്രസ് (16338/16337), എറണാകുളം-നിസാമുദ്ദീന്‍-എറണാകുളം മംഗള എക്‌സ്പ്രസ് (12617/12618), തിരുവനന്തപുരം നോര്‍ത്ത്-കോര്‍ബ-തിരുവനന്തപുരം നോര്‍ത്ത് (22648/22647) എന്നീ ട്രെയിനുകളിലാണ് ജനറല്‍ സീറ്റ് വര്‍ധിക്കുക. ഇത് ഉള്‍പ്പടെ 51 ട്രെയിനുകളിലായി 13,500 സീറ്റുകളാണ് ദക്ഷിണ റെയില്‍വേയുടെ കീഴില്‍ വര്‍ധിക്കുന്നത്. 

ഈ മാസം രാജ്യത്താകമാനം 370 ട്രെയിനുകളിലായി 1000 ജനറല്‍ കോച്ചുകള്‍ ഘടിപ്പിക്കാനാണ് റെയില്‍വേ ശ്രമം. നിലവില്‍ 583 കോച്ചുകള്‍ വിവിധ ട്രെയിനുകളിലായി ഘടിപ്പിച്ചു കഴിഞ്ഞു. അടുത്ത രണ്ട് വര്‍ഷത്തിനുള്ള 10000 നോണ്‍ എ.സി കോച്ചുകള്‍ ഘടിപ്പിക്കാനും റെയില്‍വേ പദ്ധതിയുണ്ട്. ഇതുവഴി പ്രതിദിനം എട്ട് ലക്ഷത്തിലധികം കൂടുതൽ യാത്രക്കാരെ ഉള്‍ക്കൊള്ളാനുള്ള ശേഷി കൈവരുമെന്നാണ് റെയില്‍വേയുടെ കണക്കുകൂട്ടല്‍.