കുന്നംകുളം: ചൂണ്ടല്‍ കുറ്റിപ്പുറം സംസ്ഥാന പാതയായ പെരുമ്പിലാവ് താഴത്തെ അക്കിക്കാവില്‍ നിയന്ത്രണം വിട്ട പെട്ടി ഓട്ടോ സ്‌കൂള്‍ ബസിലിടിച്ച് രണ്ടു പേര്‍ക്ക് പരുക്കേറ്റു.
ഓട്ടോ ഡ്രൈവര്‍ കാട്ടകാമ്പാല്‍ കുന്നത്തു കടവ് ചെറായി രാജന്‍ (65), ഓട്ടോ യാത്രികന്‍ ചിറക്കല്‍ ഐ.എച്ച്.ഡി.പി കോളനി പൂച്ച വളപ്പില്‍ കുഞ്ഞന്‍ മകന്‍ വിജയന്‍ (44) എന്നിവരെ അന്‍സാര്‍ ആശുപത്രിയില്‍ പ്രവേശിപ്പിച്ചു.
രാവിലെ ഒമ്പതോടെ നിറയെ കുട്ടികളുമായി സ്‌കൂളിലേക്ക് വരുന്ന അന്‍സാര്‍ സ്‌കൂള്‍ ബസാണ് അപകടത്തില്‍ പെട്ടത്.
കുന്ദംകുളം ഭാഗത്ത് നിന്നും വരുന്ന പെട്ടിഓട്ടോ അക്കിക്കാവിലെ സിഗ്‌നല്‍ കഴിഞ്ഞു പന്നിത്തടം റോഡിലേക്ക് ചരക്കു കയറ്റാന്‍ പോകേണ്ടതായിരുന്നു.
എന്നാല്‍ സിഗ്‌നല്‍ കഴിഞ്ഞത് ശ്രദ്ധയില്‍ പെട്ട ഓട്ടോ ഡ്രൈവര്‍ നടുറോഡില്‍ വച്ചു വാഹനം പന്നിത്തടം റോഡിലേക്ക് തിരിക്കുകയായിരുന്നു. തുടര്‍ന്ന് നിയന്ത്രണം വിട്ട ഓട്ടോ പുറകില്‍ വന്നിരുന്ന ബസില്‍ ഇടിക്കുകയായിരുന്നു .സ്‌കൂള്‍ ബസിലെ ഡൈവറുടെ സമയോചിതമായ ഇടപെടല്‍ മൂലം വാഹനം പരമാവധി ഒതുക്കിയതിനാല്‍ കുട്ടികള്‍ പരുക്കേല്‍ക്കാതെ രക്ഷപ്പെട്ടു . ബസിന്റെ എയര്‍ ഡോറില്‍ ഇടിച്ചതിനാല്‍ ബസ് സ്‌കൂളിലെത്തിച്ച് ഡോര്‍ വെട്ടിപൊളിച്ചാണ് ബസില്‍ നിന്നും കുട്ടികളെ ഇറക്കിയത്. ഇടിയുടെ ആഘാതത്തില്‍ ബസിന്റെയും ഓട്ടോയുടെയും മുന്‍ഭാഗം തകര്‍ന്നു. മേഖലയില്‍ ഏറെ നേരം ഗതാഗതം തടസപ്പെട്ടു. പിന്നീടു പൊലിസെത്തി. ഗതാഗതം പുന:സ്ഥാപിച്ചു.