പയ്യന്നൂര്‍: പയ്യന്നൂരിനടുത്ത് കുന്നരുവില്‍ സി.പി.എം പ്രവര്‍ത്തകനും അന്നൂരില്‍ ബി.എം.എസ് പ്രവര്‍ത്തകനും വെട്ടേറ്റുമരിച്ചു. ഡി.വൈ.എഫ്.ഐ രാമന്തളി സൗത്ത് വില്ലേജ് മുന്‍ സെക്രട്ടറി കാരന്താട്ടെ പി.വി ധനരാജ് (39) ആണ് ആദ്യം കൊല്ലപ്പെട്ടത്.

ഇന്നലെ രാത്രി പത്തോടെ ധനരാജ് വീട്ടിലേക്കു വരവെ വീട്ടുവരാന്തയില്‍ പതിയിരുന്ന സംഘം വെട്ടിപ്പരുക്കേല്‍പ്പിക്കുകയായിരുന്നു. ഉടന്‍ പരിയാരം മെഡിക്കല്‍ കോളജില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ശബ്ദംകേട്ട് ഭാര്യ സജിനിയെത്തി തടയാന്‍ ശ്രമിച്ചെങ്കിലും അക്രമികള്‍ ആയുധംകാട്ടി പിന്തിരിപ്പിച്ചു.

[caption id="attachment_43114" align="alignleft" width="150"] പി.വി ധനരാജ്[/caption]

ഇതിന്റെ തുടര്‍ച്ചയായി രാത്രി ഒരു മണിയോടെ ബി.എം.എസ് പയ്യന്നൂര്‍ മേഖലാ പ്രസിഡന്റും ഓട്ടോ ഡ്രൈവറുമായ സി.കെ രാമചന്ദ്രനും (52) വെട്ടേറ്റു മരിച്ചു. വീട്ടിലേക്ക് ബോംബെറിഞ്ഞ് ഭീതി പരത്തിയ ശേഷം രാമചന്ദ്രനെ വെട്ടുകയായിരുന്നു.

രാഷ്ട്രീയ അക്രമക്കേസുകളില്‍ പ്രതിയായ ധനരാജിനെ ആറുമാസം മുമ്പ് കാപ്പാ നിയമം ചുമത്തി ജില്ലയില്‍ നിന്നു നാടുകടത്തിയിരുന്നു. കുന്നരുവില്‍ ചെങ്കല്‍ ക്വാറി നടത്തിവരികയാണു ധനരാജ്. മൃതദേഹം പരിയാരം മെഡിക്കല്‍കോളജ് മോര്‍ച്ചറിയില്‍. രണ്ടു മക്കളുണ്ട്.

കണ്ണൂര്‍ റേഞ്ച് ഐ.ജി ദിനേന്ദ്ര കശ്യപ്, തളിപ്പറമ്പ് ഡി.വൈ.എസ്.പി എന്നിവര്‍ സംഭവസ്ഥലത്തെത്തി അന്വേഷണം ആരംഭിച്ചു. അതേ സമയം
സംഭവത്തില്‍ പ്രതിഷേധിച്ച് പയ്യന്നൂരില്‍ സി.പി.എം ഇന്ന് ഹര്‍ത്താല്‍ ആചരിക്കും. രാവിലെ ആറു മുതല്‍ വൈകീട്ട് ആറു വരെയാണ് ഹര്‍ത്താല്‍.