കുന്നംകുളം: കേന്ദ്ര-കേരള സര്‍ക്കാര്‍ നയങ്ങള്‍ക്കെതിരേ സി.പി.എം സംസ്ഥാന വ്യാപകമായി സംഘടിപ്പിച്ച പദയാത്രയിലേക്ക് പ്രവര്‍ത്തകരെ കൊണ്ടുപോകാനായി സ്വകാര്യ ബസുകള്‍ പോയതു സാധാരണ ജനങ്ങളെ വലച്ചു. വൈകീട്ടു നാലോടെ കുന്നംകുളം ബസ്സ്റ്റാന്‍ഡ് വാഹനങ്ങളില്ലാതെ ബുദ്ധിമുട്ടിയ യാത്രക്കാരാല്‍ നിറഞ്ഞിരുന്നു.
സ്‌കൂള്‍ വിട്ടിറങ്ങിയ വിദ്യാര്‍ഥികളും ജോലിക്കാരും യാത്രക്കാരുമുള്‍പ്പെടെ കുന്നംകുളത്ത് ആയിരങ്ങളാണു മണിക്കൂറുകളോളം ബസ്സ്റ്റാന്‍ഡില്‍ അകപ്പെട്ടത്.
കുന്നംകുളത്ത് സര്‍വീസ് നടത്തുന്ന 85 ശതമാനം ബസുകളും സമരമുഖത്തേക്കു പോയപ്പോള്‍ വീടെത്താന്‍ പ്രയാസപ്പെട്ട യാത്രക്കാര്‍ ആരോട് പരാതി പറയണമെന്നറിയാതെ ശരിക്കും കുഴഞ്ഞു.