തേഞ്ഞിപ്പലം: എസ്.വൈ.എസ്. പെരുവള്ളൂര്‍ പഞ്ചായത്ത് കമ്മിറ്റിയും, ജി.സി.സി. കമ്മിറ്റിയും സംയുക്തമായി ആചരിക്കുന്ന ത്രൈമാസ കാംപയിന്‍ 'എന്‍ലൈറ്റന്‍' ഉദ്ഘാടന സമ്മേളനം ഏപ്രില്‍ 16ന് ഞായറാഴ്ച വൈകുന്നേരം ഏഴ് മണിക്ക് പറമ്പില്‍ പീടിക ചെറുശ്ശേരി ഉസ്താദ് നഗറില്‍ നടക്കും. ഇസ്‌ലാം : വിശ്വാസം, ജീവിതം, ദര്‍ശനം എന്ന പ്രമേയത്തില്‍ സംഘടിപ്പിക്കുന്ന കാംപയിന്‍ ഏപ്രില്‍ 15 മുതല്‍ ജൂലായ് 15 വരെയാണ്. ഉദ്ഘാടനം കേരള വഖഫ് ബോര്‍ഡ് ചെയര്‍മാന്‍ പാണക്കാട് സയ്യിദ് റശീദലി ശിഹാബ് തങ്ങള്‍ നിര്‍വ്വഹിക്കും. സമസ്ത കേരള ഇസ്‌ലാംമത വിദ്യാഭ്യാസ ബോര്‍ഡ് ജനറല്‍ സെക്രട്ടറി എം.ടി. അബ്ദുല്ല മുസ്‌ലിയാര്‍ അനുഗ്രഹ പ്രഭാഷണം നടത്തും. ടി.പി. ഹസൈന്‍ മാസ്റ്റര്‍ അധ്യക്ഷനാകുന്ന ചടങ്ങില്‍ റഫീഖ് സക്കരിയ്യ ഫൈസി മുഖ്യ പ്രഭാഷണം നടത്തും. പി.കെ. കുഞ്ഞാലിക്കുട്ടി, പി. അബ്ദുല്‍ ഹമീദ് മാസ്റ്റര്‍ എന്നിവര്‍ അതിഥികളായി സംബന്ധിക്കും.