കാക്കനാട്: ജില്ലയില്‍ പനി ക്ലിനിക്കുകള്‍ സജീവമാക്കണമെന്നും റോഡുകളുടെ ശോച്യാവസ്ഥ പരിഹരിക്കണമെന്നും ഭൂമി കൈയേറ്റം ഒഴിപ്പിക്കണമെന്നുമുള്ള ആവശ്യങ്ങള്‍ ജില്ലാ വികസനസമിതിയില്‍ എം.എല്‍.എമാര്‍ ഉന്നയിച്ചു. പനിയ്ക്ക് ചികിത്സ തേടിയെത്തുന്നവരുടെ എണ്ണം അനുദിനം വര്‍ധിക്കുകാണ്. ഫലപ്രദമായ ചികിത്സ ഉറപ്പു വരുത്തുന്നതിന് ജനറല്‍ ആശുപത്രികളിലും താലൂക്ക് ആശുപത്രികളിലും മതിയായ ചികിത്സാ സൗകര്യങ്ങള്‍ ഒരുക്കണമെന്നും എല്‍ദോ എബ്രഹാം എം.എല്‍.എ പറഞ്ഞു.
പൊതുനിരത്തില്‍ അപകടഭീഷണിയുയര്‍ത്തി നില്‍ക്കുന്ന മരങ്ങള്‍ ലേലനടപടികള്‍ പൂര്‍ത്തിയാക്കി മുറിച്ചുമാറ്റണമെന്നും അദ്ദേഹം പറഞ്ഞു. മുളവൂര്‍ വില്ലേജിനെ സ്മാര്‍ട്ട് വില്ലേജാക്കുന്നതിനുള്ള നടപടികള്‍ ത്വരിതപ്പെടുത്താന്‍ അദ്ദേഹം നിര്‍ദേശിച്ചു.
സ്‌കൂളുകള്‍ ഹൈടെക്കാക്കുന്നതിന്റെ ഭാഗമായി ക്ലാസ് മുറികളോ കെട്ടിടങ്ങളോ പൊളിച്ചു മാറ്റുന്നത് അധ്യയനത്തെ ബാധിക്കാതിരിക്കാന്‍ ബദല്‍ സംവിധാനം ഒരുക്കണമെന്നും എല്‍ദോ എബ്രഹാം എം.എല്‍.എ പറഞ്ഞു. കൊച്ചി മെട്രോ നിര്‍മാണത്തിന്റെ ഭാഗമായി കണയന്നൂര്‍ താലൂക്കിലെ പുറമ്പോക്കു ഭൂമിയില്‍നിന്നും ഒഴിപ്പിച്ച കുടുംബത്തിന് ആറു ലക്ഷം രൂപയും വീടും നല്‍കാമെന്ന് അധികൃതര്‍ നല്‍കിയിരുന്ന വാക്കു പാലിക്കാന്‍ നടപടികള്‍ കൈക്കൊള്ളണമെന്ന് പി.ടി തോമസ് എം.എല്‍.എ ആവശ്യപ്പെട്ടു.
പെരിയാര്‍വാലി കനാലിന്റെ ഭൂമിയിലെ അനധികൃത കൈയേറ്റങ്ങള്‍ ഒഴിപ്പിക്കുന്നതിന് ഇറിഗേഷന്‍ വകുപ്പിനോട് അദ്ദേഹം ആവശ്യപ്പെട്ടു. കൊച്ചി മെട്രോ നിര്‍മ്മാണത്തിന്റെ അവശിഷ്ടങ്ങള്‍ നിക്ഷേപിച്ചതുമൂലം ഇടപ്പള്ളി തോടിന്റെ ഒഴുക്ക് തടസപ്പെട്ടതായും മാലിന്യം നീക്കാന്‍ കൊച്ചി മെട്രോ അധികൃതരെ ചുമതലപ്പെടുത്തണമെന്നും വാട്ടര്‍ അതോറിറ്റി അധികൃതരോടാവശ്യപ്പെട്ടു.
ചിത്രപ്പുഴ കരിമുഗള്‍ റോഡിന്റെ ശോച്യാവസ്ഥ പരിഹരിക്കാന്‍ അടിയന്തിര നടപടി കൈക്കൊള്ളുമെന്ന് വി.പി സജീന്ദ്രന്‍ എം.എല്‍.എ ആവശ്യപ്പെട്ടു. മഞ്ഞപ്പെട്ടിയില്‍ കെ.എസ്.ഇ.ബി ഓഫിസ് നിര്‍മിക്കുന്നതിന് പ്രദേശവാസിയായ ഒരാള്‍ സൗജന്യമായി സ്ഥലം വിട്ടു നല്‍കിയിട്ടും നെല്‍ വയലാണെന്ന കാരണത്താല്‍ നിര്‍മ്മാണം മുടങ്ങിയിരുന്നു. എന്നാല്‍ നെല്‍വയല്‍ തണ്ണീര്‍ത്തട നിയമത്തില്‍ ഇളവനുവദിക്കപ്പെട്ട സാഹചര്യത്തില്‍ ജില്ലാ കലക്ടര്‍ക്ക് വീണ്ടും റിപ്പോര്‍ട്ടു സമര്‍പ്പിക്കാന്‍ കെ.എസ്.ഇ.ബി.യോട് ആവശ്യപ്പെട്ടു.
മഞ്ഞപ്പെട്ടി മുതല്‍ പെരിയാര്‍വരെയുള്ള പ്രദേശങ്ങളിലെ വോള്‍ട്ടേജ് ക്ഷാമം പരിഹരിക്കാനും നിര്‍ദ്ദേശിച്ചു. പറവൂര്‍ താലൂക്ക് ആശുപത്രിയിലെ ഡോക്ടര്‍മാരുടെ ഒഴിവുകള്‍ അടിയന്തിരമായി നികത്തണമെന്ന് പറവൂര്‍ മുന്‍സിപ്പല്‍ ചെയര്‍മാന്‍ രമേഷ് കുറുപ്പ് ആവശ്യപ്പെട്ടു.
ഇന്‍ഫോപാര്‍ക്ക് മുതല്‍ തുറവൂര്‍ വരെ വൈകുന്നേരത്ത് കെ.എസ്.ആര്‍.ടി.സി. സര്‍വ്വീസ് ആരംഭിച്ചതായി ജില്ലാ പ്ലാനിങ് ഓഫീസര്‍ സാലി ജോസഫ് യോഗത്തില്‍ അറിയിച്ചു. വൈകിട്ട് അഞ്ചിന് ഇന്‍ഫോപാര്‍ക്ക് പരിസരത്തുനിന്നും ബസ്സ് പുറപ്പെടും. ഡെപ്യൂട്ടി കലക്ടര്‍ എം.പി.ജോസ്, തൃക്കാക്കര മുന്‍സിപ്പല്‍ ചെയര്‍ പേഴ്‌സണ്‍ എം.ടി.ഓമന, തദ്ദേശ സ്വയംഭരണ സ്ഥാപന പ്രതിനിധികള്‍, ജില്ലാതല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.