കോഴിക്കോട്: വെള്ളിമാട്കുന്ന് ഗവ. ചില്‍ഡ്രന്‍സ് ഹോമിലെ അന്തേവാസിയായ പന്ത്രണ്ടുവയസുകാരന്‍ കുമാര്‍ ഇന്ന് സ്വദേശമായ ഷില്ലോങിലേക്ക് തിരിക്കും. കഴിഞ്ഞ ഓഗസ്റ്റ് 16 നാണ് ഫറോക്ക് പൊലിസും ചൈല്‍ഡ് ലൈന്‍ അധികൃതരും ചേര്‍ന്ന് കുമാറിനെ  ഗവ. ചില്‍ഡ്രന്‍സ് ഹോമില്‍ പ്രവേശിപ്പിച്ചത്.
മേഘാലയയിലെ ഈസ്റ്റ് കാഷി ഹില്‍സിലാണ് തന്റെ വീടെന്ന് പറഞ്ഞിരുന്നെങ്കിലും രക്ഷിതാക്കള്‍, സ്വദേശം എന്നിവയെക്കുറിച്ച് വ്യക്തമായ വിവരം ഉണ്ടായിരുന്നില്ല.
 കുട്ടിയുടെ രക്ഷിതാക്കളെ കണ്ടെത്തുന്നതിനായി കോഴിക്കോട് ചൈല്‍ഡ് വെല്‍ഫയര്‍ കമ്മിറ്റിയുടെ ഉത്തരവനുസരിച്ച് ഇന്ത്യ മുഴുവന്‍ പ്രചാരമുള്ള ദൃശ്യ പത്രമാധ്യമങ്ങളില്‍ ഫോട്ടോ സഹിതമുള്ള വാര്‍ത്ത  പ്രസിദ്ധീകരിക്കുന്നതിന് നടപടികള്‍ സ്വീകരിച്ചു. ഇതേ തുടര്‍ന്ന് ബീഹാര്‍ സ്വദേശികളായ രക്ഷിതാക്കളെ  കണ്ടെത്താന്‍ സാധിക്കുകയും ചെയ്തു.
ഇന്ന് ചില്‍ഡ്രന്‍സ് ഹോമില്‍ നിന്നും യാത്ര തിരിക്കുന്ന കുമാറും  സംഘവും 21 ന് ഷില്ലോങില്‍ എത്തിച്ചേരും. കോഴിക്കോട് വെള്ളിമാട്കുന്ന് ഗവ. ചില്‍ഡ്രന്‍സ്  ഹോമില്‍ താമസിക്കുന്ന ഇതര സംസ്ഥാനക്കാരായ മുഴുവന്‍ കുട്ടികളുടേയും രക്ഷിതാക്കളെ കണ്ടെത്താനുള്ള  നടപടികള്‍ അധികൃതര്‍ സ്വീകരിച്ചു വരികയാണ്. മൂന്നു കുട്ടികളുടെ രക്ഷിതാക്കളെ കണ്ടെത്താനുള്ള നടപടികള്‍ പുരോഗമിച്ചു വരികയാണെന്നും അധികൃതര്‍ അറിയിച്ചു.