വടകര: അക്കാദമിക് പരിശീലന രംഗത്ത് മികച്ച നേട്ടങ്ങള്‍ കരസ്ഥമാക്കി പ്രശസ്തി കൈവരിച്ച വിലങ്ങില്‍ ഹമീദ് ഔദ്യോഗിക സേവനം അവസാനിപ്പിച്ച് ഇന്ന് സ്‌കൂളിന്റെ പടിയിറങ്ങുന്നു.
വടകര എം.യു.എം വി.എച്ച്.എസ് സ്‌കൂളില്‍നിന്ന് 32 വര്‍ഷത്തെ സേവനത്തിന് ശേഷമാണ് വിലങ്ങില്‍ ഹമീദ് വിരമിക്കുന്നത്. നീണ്ട രണ്ടു പതിറ്റാണ്ടായി അധ്യാപക പരിശീലനത്തില്‍ സജീവമാണ് ഇദ്ദേഹം. സ്റ്റേറ്റ് റിസോഴ്‌സ് ഗ്രൂപ്പ് ട്രെയിനര്‍, സ്റ്റേറ്റ് ഇന്‍സ്റ്റിറ്റ്യൂട്ട് ഓഫ് എജുക്കേഷന്‍ ടെക്‌നോളജി എക്‌സിക്യുട്ടീവ് അംഗം, എസ്.സി.ആര്‍.ടി സിലബസ് ഫ്രെയിംവര്‍ക് അംഗം, സംസ്ഥാന പാഠപുസ്തക സമിതി അംഗം എന്നീ നിലകളില്‍ പ്രവര്‍ത്തിച്ചു വരികയാണ്.
സയന്‍സില്‍ ബിരുദവും രാഷ്ട്രതന്ത്രത്തിലും എജുക്കേഷന്‍ ടെക്‌നോളജിയിലും ബിരുദാനന്തര ബിരുദവും നേടിയ ഹമീദ് മാസ്റ്റര്‍ കൗണ്‍സിലിങ് സൈക്കോളജിയില്‍ പി.ജി ഡിപ്ലോമക്ക് പഠിക്കുകയാണ് ഇപ്പോള്‍. പത്ത് വര്‍ഷം പ്രൈമറിയിലും 22 വര്‍ഷം ഹൈസ്‌കൂളിലും സേവനമനുഷ്ഠിച്ച ഇദ്ദേഹം കുട്ടികളുടെ പ്രിയപ്പെട്ട അധ്യാപകനാണ്. ആകാശവാണിയില്‍ വിദ്യഭ്യാസ പരിപാടികളും അവതരിപ്പിച്ചിട്ടുണ്ട്. പാലിയേറ്റീവ് രംഗത്തും സജീവ സാന്നിധ്യമാണ്. ഭാര്യ: ജമീല. അയനിക്കാട് എം.എല്‍.പി സ്‌കൂളില്‍ അധ്യാപികയാണ്.