കല്‍പ്പറ്റ: എന്റെ മാലിന്യം എന്റെ ഉത്തരവാദിത്തം നയം നടപ്പിലാക്കുന്നതിന്റെ ഭാഗമായി ശുചിത്വമിഷന്റെ നേതൃത്വത്തില്‍ പഞ്ചായത്ത്-നഗരസഭകള്‍ കേന്ദ്രീകരിച്ച് ക്യാംപുകള്‍ സംഘടിപ്പിക്കുന്നു.
ചക്ക, മാങ്ങ, തേങ്ങ എന്നീ പേരുകളിലാണ് മുഴുവന്‍ പഞ്ചായത്തുകളിലും നഗരസഭകളിലും കുട്ടികള്‍ക്കായി ക്യാംപ് നടത്തുന്നത്. മഴക്കാല പൂര്‍വ ശുചീകരണത്തിന്റെ ഭാഗമായി നടത്തുന്ന ക്യാംപില്‍ ആറ് മുതല്‍ 12 വരെ ക്ലാസുകളിലുള്ള കുട്ടികള്‍ക്കാണ് പങ്കെടുക്കാന്‍ അവസരം. തദ്ദേശ സ്ഥാപനങ്ങളുടെ അജൈവ മാലിന്യ സംസ്‌കരണ പദ്ധതികള്‍ വിജയിപ്പിക്കാനുള്ള സന്ദേശം കുട്ടികളിലൂടെ പൊതുജനങ്ങളിലെത്തിക്കാനുള്ള മുന്നൊരുക്കമാണ് ശുചിത്വ മിഷന്റെ ഈ ക്യാംപ്. പ്രാദേശികമായി ലഭിക്കുന്ന വിഷമില്ലാത്ത ഭക്ഷണവും പാഴ്‌വസ്തുവെന്ന് കരുതുന്നവ പുനരുപയോഗിക്കാന്‍ സഹായിക്കുന്ന പരിശീലനങ്ങളും നഷ്ടപ്പെട്ടുപോയ നാടന്‍ കളികളും മത്സരങ്ങളും സന്ദേശ റാലിയും ഭവന സന്ദര്‍ശനങ്ങളുമാണ് ക്യാംപിന്റെ സവിശേഷത.
വാര്‍ത്താസമ്മേളനത്തില്‍ ശുചിത്വ മിഷന്‍ പ്രോഗ്രാം കോര്‍ഡിനേറ്റര്‍ കെ. അനൂപ്, സജിന്‍ ജോസഫ് എന്നിവര്‍ പങ്കെടുത്തു.