മലപ്പുറം: വയനാട് ലോക്‌സഭാ മണ്ഡലത്തില്‍ യു.ഡി.എഫ് സ്ഥാനാര്‍ഥിയുടെ പ്രഖ്യാപനം ഇനിയും വൈകരുതെന്ന് മുസ്‌ലിം ലീഗ്. തീരുമാനം വൈകുന്നത് വയനാട്ടില്‍ മാത്രമല്ല കേരളത്തിലെ മറ്റു മണ്ഡലങ്ങളെയും ബാധിക്കാന്‍ സാധ്യതയുണ്ടെന്നും മുസ്‌ലിം ലീഗ് മലപ്പുറത്തു ചേര്‍ന്ന യോഗത്തില്‍ അഭിപ്രായമുയര്‍ന്നു.

വിഷയം കോണ്‍ഗ്രസ് നേതൃത്വത്തെ സംസ്ഥാന പ്രസിഡന്റ് പാണക്കാട് ഹൈദരലി ശിഹാബ് തങ്ങള്‍ തന്നെ അറിയിച്ചിട്ടുണ്ട്.
എന്നാല്‍ വയനാട്ടില്‍ സ്ഥാനാര്‍ഥി നിര്‍ണയം വൈകുന്നത് കോണ്‍ഗ്രസിലെ ആഭ്യന്തര പ്രശ്‌നമാണെന്നും അതുടനെ പരിഹരിക്കുമെന്നും പി.കെ കുഞ്ഞാലിക്കുട്ടി മാധ്യമങ്ങളോടു പറഞ്ഞു.

രാഹുല്‍ ഗാന്ധി മത്സരിച്ചാലും ഇല്ലെങ്കിലും  സ്ഥാനാര്‍ഥി നിര്‍ണയം പെട്ടെന്നു വേണം. പലയിടത്തും മണ്ഡലം കണ്‍വന്‍ഷനുകള്‍ പോലും മാറ്റിവയ്‌ക്കേണ്ടി വന്നിട്ടുണ്ട്. സ്ഥാനാര്‍ഥിയെ പ്രഖ്യാപിക്കാതെ എങ്ങനെ തെരഞ്ഞെടുപ്പ് കണ്‍വന്‍ഷന്‍ നടത്തുമെന്നു ചോദിക്കുന്നവരുണ്ട്. അവരോട് മറുപടി പറയാന്‍ കഴിയുന്നില്ലെന്നാണ് പ്രവര്‍ത്തകര്‍ ഉയര്‍ത്തുന്ന ചോദ്യം.
എന്നാല്‍ രണ്ടു ദിവസത്തിനകം രാഹുലിന്റെ കാര്യത്തില്‍ തീരുമാനമുണ്ടാകുമെന്നാണ് പ്രതീക്ഷിക്കുന്നത്. കര്‍ണാടകയിലെ റാലിക്കു മുമ്പ് സ്ഥാനാര്‍ഥിത്വത്തില്‍ പ്രഖ്യാപനം ഉണ്ടാകുമെന്നാണ് ദേശീയ നേതാക്കള്‍ നല്‍കുന്ന സൂചന.

അതേ സമയംരാഹുല്‍ ഗാന്ധി വയനാട്ടില്‍ മത്സരിക്കുന്നതിനെതിരേ സി.പി.എം ഡല്‍ഹിയില്‍ അന്തര്‍നാടകങ്ങള്‍ നടത്തിയെന്നായിരുന്നു കെ.പി.സി.സി. അധ്യക്ഷന്‍ മുല്ലപ്പള്ളി രാമചന്ദ്രന്‍ കഴിഞ്ഞ ദിവസം പ്രതികരിച്ചത്. ഇക്കാര്യത്തില്‍ കൂടുതല്‍ വിശദാംശങ്ങള്‍ വരും ദിവസങ്ങളില്‍ വെളിപ്പെടുത്തുമെന്നും രാഹുലിന്റെ വരവ് ചിലരെ ഭയപ്പെടുത്തുന്നുണ്ടെന്നും മുല്ലപ്പള്ളി പറഞ്ഞിരുന്നു.
വയനാട് സ്ഥാനാര്‍ഥിത്വത്തില്‍ അന്തിമ തീരുമാനമെടുക്കേണ്ടത് രാഹുല്‍ ഗാന്ധിയാണ്. വയനാട്ടിലെ സ്ഥാനാര്‍ഥി പ്രഖ്യാപനത്തില്‍ ഉടന്‍ തീരുമാനമുണ്ടാകും. സ്ഥാനാര്‍ഥി പ്രഖ്യാപനം വൈകുന്നത് വിജയസാധ്യതയെ ബാധിക്കില്ലെന്നും മുല്ലപ്പള്ളി പറഞ്ഞിരുന്നു.