കോഴിക്കോട്: കേന്ദ്ര-സംസ്ഥാന സര്‍ക്കാരുകളുടെ പ്രവാസികളോടുള്ള അവഗണനക്കെതിരേ സുന്നി യുവജന സംഘം സംസ്ഥാന കമ്മിറ്റിയുടെ ആഭിമുഖ്യത്തില്‍ സംഘടിപ്പിച്ച 'പ്രതിഷേധമുറ്റം' പരിപാടി കനത്ത താക്കീതായി. ഇന്നലെ രാവിലെ നടന്ന പ്രതിഷേധത്തില്‍ 3,500ഓളം ശാഖകളിലായി പതിനായിരത്തോളം പ്രവര്‍ത്തകര്‍ അണിനിരന്നു.
രാവിലെ 10.10ന് സംസ്ഥാന, ജില്ലാ, മണ്ഡലം, പഞ്ചായത്ത്, ശാഖാ ഭാരവാഹികള്‍ അവരുടെ വീട്ടുമുറ്റത്ത് പ്ലക്കാര്‍ഡുകളേന്തി പ്രതിഷേധിച്ചു. പ്രവാസികളെ നടുക്കടലില്‍ നിര്‍ത്തുന്ന കേന്ദ്ര-സംസ്ഥാന സര്‍ക്കാരുകളുടെ സമീപനം അവസാനിപ്പിക്കുക, സര്‍ക്കാരുകളുടെ പോരാട്ടം പ്രവാസികളോട് വേണ്ട കൊവിഡിനോട് മതി, നാടിനെ പുഷ്‌ക്കലമാക്കിയ പ്രവാസികളെ ദുരിതത്തിലാക്കാന്‍ അനുവദിക്കില്ല തുടങ്ങിയ പ്രതിഷേധ സന്ദേശങ്ങളാണ് പ്ലക്കാര്‍ഡുകളില്‍ ഉയര്‍ത്തിയത്.
കൊവിഡ് വ്യാപനത്തില്‍ പ്രതിസന്ധിയിലകപ്പെട്ട് പലരുടെയും സഹായത്താലും ത്യാഗം ചെയ്തും നാട്ടിലെത്താന്‍ ശ്രമിക്കുന്ന പ്രവാസികള്‍ക്ക് വഹിക്കാവുന്നതിലധികം ചെലവുകളും യാതനകളും അടിച്ചേല്‍പ്പിക്കുന്നത് ഒഴിവാക്കണമെന്നും സൗജന്യ ക്വാറന്റൈയിന്‍ അനുവദിക്കണമെന്നും ആവശ്യപ്പെട്ടാണ് പ്രതിഷേധമുറ്റം സംഘടിപ്പിച്ചത്. സോഷ്യല്‍ മീഡിയയില്‍ നേതാക്കളും പ്രവര്‍ത്തകരും പ്രതിഷേധ പ്ലക്കാര്‍ഡുകളേന്തിയ ഫോട്ടോകള്‍ പോസ്റ്റ് ചെയ്തും പരിപാടി ശ്രദ്ധേയമാക്കി.
കൊവിഡ് വ്യാപനത്തില്‍ പ്രതിസന്ധിയിലായ പ്രവാസികളെ കൂടുതല്‍ ദുരിതക്കയത്തിലാക്കുന്ന കേന്ദ്ര-സംസ്ഥാന സര്‍ക്കാരുകളുടെ നയങ്ങള്‍ തിരുത്തണമെന്ന് നേതാക്കളും പ്രവര്‍ത്തകരും ആവശ്യപ്പെട്ടു.