ന്യൂഡല്‍ഹി: അതിര്‍ത്തിയില്‍ ചൈനയുമായുണ്ടായ ഏറ്റുമുട്ടലില്‍ ഇന്ത്യയുടെ 20 സൈനികര്‍ വീരമൃത്യൂ വരിച്ച് ദിവസങ്ങള്‍ക്കു ശേഷവും സര്‍ക്കാരിന്റെ ഒളിച്ചുകളിയെ ചോദ്യം ചെയ്ത് കോണ്‍ഗ്രസ് നേതാക്കളായ രാഹുല്‍ ഗാന്ധിയും പ്രിയങ്കാ ഗാന്ധിയും.
നരേന്ദ്രമോദി ശരിക്കും ചൈനയ്ക്കു മുന്‍പില്‍ സറണ്ടര്‍ മോദി (കീഴടങ്ങിയ മോദി) യാണെന്നായിരുന്നു ഇന്നലെ രാഹുല്‍ ആരോപിച്ചത്. രാഹുലിന്റെ ട്വീറ്റ് പ്രിയങ്കാ ഗാന്ധിയും പങ്കുവച്ചിട്ടുണ്ട്.
നേരത്തെ, ഇന്ത്യന്‍ അതിര്‍ത്തിയിലേക്കു ചൈന പ്രവേശിച്ചിട്ടില്ലെന്ന് സര്‍വകക്ഷി യോഗത്തില്‍ പ്രധാനമന്ത്രി പറഞ്ഞത് വിവാദങ്ങള്‍ക്കിടയാക്കിയിരുന്നു. ഇതിനു പിന്നാലെ, പിന്നെ എവിടെവച്ച് എങ്ങനെയാണ് ഇന്ത്യന്‍ സൈനികര്‍ കൊല്ലപ്പെട്ടതെന്ന ചോദ്യവുമായി പ്രതിപക്ഷം രംഗത്തെത്തി.
ഇതോടെ, മോദിയുടെ പ്രസ്താവനയില്‍ വിശദീകരണവുമായി പ്രധാനമന്ത്രിയുടെ ഓഫിസ് രംഗത്തെത്തുകയും ചെയ്തിരുന്നു. ഇതിനു പിന്നാലെയാണ് രാഹുലിന്റെ പുതിയ വിമര്‍ശനം. ഇന്ത്യന്‍ ഭൂമി മോദി ചൈനയ്ക്കു മുന്നില്‍ അടിയറവുവച്ചെന്ന ആരോപണവുമായി നേരത്തെയും രാഹുല്‍ രംഗത്തെത്തിയിരുന്നു.
ഇതിനു പിന്നാലെ, ബി.ജെ.പിക്കു പുതിയ പേരു നിര്‍ദേശിച്ച് പ്രതിപക്ഷ നേതാക്കളും പ്രവര്‍ത്തകരും രംഗത്തെത്തിയിട്ടുമുണ്ട്.
ബി.ജെ.പി എന്നതിന്റെ മുഴുവന്‍ രൂപം ബെയ്ജിങ് ജിന്‍പിങ് പാര്‍ട്ടിയെന്നാണ് ട്രോളുകളില്‍ നിറയുന്നത്. അതേസമയം, മോദിയും ബി.ജെ.പിയും ജനങ്ങളുടെ വികാരം ഉപയോഗപ്പെടുത്തി രാഷ്ട്രീയം കളിക്കുകയാണെന്ന ആരോപണവുമായി കമല്‍ഹാസനും രംഗത്തെത്തിയിട്ടുണ്ട്.