തിരുവനന്തപുരം: സംസ്ഥാനത്ത് വിനോദ സഞ്ചാര മേഖലയില്‍നിന്നു നേരിട്ടും അല്ലാതെയുമുള്ള വരുമാനത്തില്‍ കഴിഞ്ഞ വര്‍ഷം 12.56 ശതമാനം വര്‍ധനവ്. കഴിഞ്ഞ വര്‍ഷം ആകെ 33383.68 കോടി രൂപയാണ് വിനോദ സഞ്ചാര മേഖലയില്‍ നിന്ന് സംസ്ഥാനത്തിന് ലഭിച്ചത്. 2016ല്‍ ഇത് 29658.56 കോടി രൂപയായിരുന്നു. 3725.12 കോടിയുടെ വര്‍ധനവാണ് ഉണ്ടായതെന്ന് വിനോദ സഞ്ചാരവകുപ്പിന്റെ കണക്കുകള്‍ പറയുന്നു. വിദേശ നാണ്യത്തില്‍ 8.29 ശതമാനം വര്‍ധനവാണുണ്ടായത്. കഴിഞ്ഞ വര്‍ഷം 8392.11 കോടി രൂപയുടെ വിദേശ നാണ്യമാണ് വിനോദ സഞ്ചാരത്തില്‍ നിന്നു ലഭിച്ചത്. 2016ല്‍ ഇത് 7749.51 കോടി രൂപയായിരുന്നു. 

സഞ്ചാരികളുടെ എണ്ണത്തിലും വര്‍ധനവുണ്ടായി. രാജ്യത്തിനകത്തുനിന്നും പുറത്തു നിന്നുമായി കഴിഞ്ഞ വര്‍ഷം ആകെ 1,57,65,390 പേരാണ് സംസ്ഥാനത്തെത്തിയത്. 2016നെ അപേക്ഷിച്ച് 10.94 ശതമാനം വര്‍ധനവ്. വിദേശ സഞ്ചാരികളുടെ മാത്രം കണക്കെടുത്താല്‍ 5.15 ശതമാനം വര്‍ധനവാണുണ്ടായത്. കഴിഞ്ഞ വര്‍ഷം 10,91,870 വിദേശ സഞ്ചാരികളാണ് കേരളത്തിലെത്തിയത്. 2016ല്‍ ഇത് 10,38,419 പേരായിരുന്നു. ആഭ്യന്തര സഞ്ചാരികളുടെ എണ്ണത്തില്‍ 11.39 ശതമാനം വര്‍ധനവുണ്ടായി. സംസ്ഥാനത്ത് കഴിഞ്ഞ വര്‍ഷം ഏറ്റവും കൂടുതല്‍ സഞ്ചാരികള്‍ എത്തിയത് എറണാകുളം ജില്ലയിലാണ്. 3,739,061 പേരാണ് സ്വദേശത്തും വിദേശത്തും നിന്നായി എറണാകുളത്തെത്തിയത്. രണ്ടാം സ്ഥാനം തിരുവനന്തപുരത്തിനാണ്. 2,926,052 പേര്‍. മൂന്നാമത് തൃശൂര്‍ ജില്ലയാണ് 2,653,321 പേര്‍ ഇവിടെ സന്ദര്‍ശനത്തിയെന്നും വിനോദ സഞ്ചാരവകുപ്പിന്റെ കണക്കുകള്‍ വ്യക്തമാക്കുന്നു.