വണ്ടൂര്‍: സൗജന്യമായി കുടിവെള്ളമെത്തിച്ച് മാതൃകയാകുകയാണ് കൂരാട് ചളിപ്പാടം കുഞ്ഞിമുഹമ്മദ്. പഴയ വാണിയമ്പലം മൈലാടിക്കുന്നിലെ 12 കുടുംബങ്ങള്‍ക്കാണ് കുടിവെള്ളം മുട്ടിയപ്പോള്‍ ഇദ്ദേഹം സൗജന്യമായി ഇഷ്ടാനുസരണം വെള്ളം എത്തിച്ചുനല്‍കുന്നത്. വണ്ടൂര്‍ പഞ്ചായത്തിലെ ഇരുപതാം വാര്‍ഡില്‍ പെടുന്നതാണ് മൈലാടികുന്ന് കോളനി.
മിക്ക വീടുകളിലും കിണറുകളുണ്ടെങ്കിലും വേനലാരംഭത്തില്‍ തന്നെ വറ്റും. കോളനികാര്‍ക്കായി പഞ്ചായത്ത് നിര്‍മിച്ച രണ്ട് കിണറുകളും തകര്‍ന്ന് കിടക്കുകയാണ്. പിന്നീട് ഇടക്കെത്തുന്ന ജലനിധിയിലെ വെള്ളമാണ് ഏക ആശ്രയം.എന്നാല്‍ ആവശ്യാനുസരണം വെള്ളം ലഭിക്കാതായതോടെ കോളനിക്കാര്‍ അനുഭവിക്കുന്ന പ്രയാസങ്ങള്‍ സമീപത്ത് കൃഷി നടത്തുന്ന കുഞ്ഞിമുഹമ്മദ് നേരിട്ടറിഞ്ഞു.
കൂടാതെ പ്രവാസിയായിരുന്നപ്പോള്‍ അനുഭവിച്ചിരുന്ന വെള്ള ക്ഷാമവും കാരണം ഇദ്ദേഹം മുന്നിട്ടിറങ്ങി കുടിവെള്ളമെത്തിച്ച് നല്‍കാന്‍ തുടങ്ങി. തുടര്‍ന്ന് കൃഷിക്കായി നിര്‍മിച്ച കുഴല്‍ കിണറും ഇതിലെ വെള്ളവും പൂര്‍ണമായി വിട്ടു നല്‍കി.
താമസസ്ഥലമായ കൂരാടില്‍ നിന്നും പഴയ വാണിയമ്പലത്തേക്ക് 7 കിലോ മീറ്റര്‍ ദൂരമുണ്ട്. ഇതിനാല്‍ ഒന്നിടവിട്ടുള്ള ദിവസങ്ങളില്‍ രാവിലെ എട്ടിന് ബൈക്കിലെത്തി കുഞ്ഞിമുഹമ്മദ് കോളനിക്കാര്‍ക്കായി വെള്ളമെത്തിച്ച് നല്‍കും.