ദമാം: കൊവിഡ്-19 വ്യാപനത്തെ തുടർന്ന് ദുരിതത്തിലായ പ്രവാസികൾക്ക് സഹായകരമായി ഇന്ത്യൻ സോഷ്യൽ ഫോറം ആരംഭിച്ച 'നാട്ടിലേക്കൊരു വിമാന ടിക്കറ്റ്' പദ്ധതിയിൽ 26 പേർ നാട്ടിലേക്ക് തിരിച്ചു. ദമാമിൽ നിന്നും കോഴിക്കോടേക്ക്‌ തിരിച്ച ഫ്ലൈനാസ് വിമാനത്തിലാണ് 26 പേർക്കുള്ള യാത്ര സൗകര്യം ഒരുക്കിയിരുന്നത്. ജോലി നഷ്ടപ്പെട്ടവർ, ശമ്പള കുടിശിക കിട്ടാത്തവർ, അസുഖ ബാധിതർ, വിസിറ്റിംഗ് വിസയിൽ വന്നു കാലാവധി കഴിഞ്ഞവർ തുടങ്ങിയ ഒട്ടേറെ വിഭാഗങ്ങളാണ് പദ്ധതി വഴി യാത്ര തിരിച്ചത്.
നാടണയാൻ കൊതിക്കുന്നവർക്ക് സഹായഹസ്തവുമായി ഇന്ത്യൻ സോഷ്യൽ ഫോറം കഴിഞ്ഞ ഒരു മാസമായി നടത്തിവരുന്ന പദ്ധതിയിൽ നിരവധി പേരാണ് രജിസ്റ്റർ ചെയ്തിരിക്കുന്നത്.
കൊവിഡ് കാലത്ത് പ്രവാസികളിൽ ഏറെ ദുരിതമനുഭവിക്കുന്നവരെ കണ്ടെത്തി സഹായിക്കുന്ന ഈ പദ്ധതി നിരവധി പേർക്കാണ് ആശ്വാസകരമായിരിക്കുന്നത്. ചെറിയ വരുമാനമുള്ളവര്‍, ലോക്ഡൗണ്‍ മൂലം തൊഴില്‍ നഷ്ടപ്പെട്ടവര്‍, അടിയന്തരമായി നാട്ടില്‍ ചികിത്സക്ക് പോകാന്‍ സാമ്പത്തിക ശേഷി ഇല്ലാത്തവര്‍ തുടങ്ങിയവരില്‍ നിന്ന് അര്‍ഹരായവരെ നേരിട്ട് കണ്ടെത്തിയാണ് സൗജന്യമായി വിമാന ടിക്കറ്റുകൾ നൽകുന്നത്. സഊദിയിലെ വിവിധ പ്രവിശ്യാ കമ്മിറ്റികളുടെ കീഴിൽ വെൽഫെയർ വിങ് വോളന്റിയർമാരിലൂടെയാണ് ബുദ്ധിമുട്ടനുഭവിക്കുന്ന ജനങ്ങൾക്കുള്ള സേവനങ്ങൾ ഏകോപിപ്പിച്ചിരിക്കുന്നതെന്ന് സോഷ്യൽ ഫോറം നേതാക്കളായ മൻസൂർ എടക്കാട്, നമീർ ചെറുവാടി എന്നിവർ പറഞ്ഞു.