സുല്‍ത്താന്‍ ബത്തേരി: വൈദ്യുതി പോയാല്‍ ഇരുട്ടില്‍ മുങ്ങി സുല്‍ത്താന്‍ ബത്തേരി താലൂക്ക് ആയുര്‍വേദ ആശുപത്രി. ആശുപത്രയിലെ ജനറേറ്റര്‍ ഇതുവരെ പ്രവര്‍ത്തിക്കാന്‍ നടപടി സ്വീകരിക്കാത്തതാണ് ഇരുട്ടിലാകാന്‍ കാരണം.
രണ്ട് വര്‍ഷം മുമ്പാണ് ആശുപത്രിയില്‍ രണ്ട് ലക്ഷം രൂപ മുടക്കി പുതിയ ജനറേറ്റര്‍ വാങ്ങിയത്. എന്നാല്‍ ഇത് പ്രവര്‍ത്തിപ്പിക്കാന്‍ തുടര്‍ നടപടികള്‍ സ്വീകരിച്ചില്ല. ഇതോടെ ജനറേറ്ററിന്റെ ബാറ്ററി തകരാറിലാവുകയും ചെയ്തു.
വൈദ്യുതി നിലക്കുന്ന സമയത്ത് പ്രവര്‍ത്തിപ്പിക്കുന്നതിനായി വാങ്ങിയ ജനറേറ്ററാണ് ഇത്തരത്തില്‍ പ്രവര്‍ത്തനരഹിതമായിരിക്കുന്നത്. ഇതോടെ വൈദ്യുതി നിലച്ചാല്‍ ആശുപത്രി ഇരുട്ടിലാവുകയാണ് പതിവ്.
ദിവസേന 100 കണക്കിന് രോഗികള്‍ ചികില്‍സ തേടിയെത്തുതാണ് സുല്‍ത്താന്‍ ബത്തേരി താലൂക്ക് ആയുര്‍വേദ ആശുപത്രി. ഇവിടെ 50-ാളം രോഗികളെ കിടത്തി ചികില്‍സിക്കുന്നുമുണ്ട്. നിസാര പ്രശ്‌നത്തിന്റെ പേരില്‍ ജനറേറ്റര്‍ പ്രവര്‍പ്പിക്കാത്തത് അധികൃതരുടെ അനാസ്ഥയാണ് ചൂണ്ടികാണിക്കുന്നത്.
അതേ സമയം സംഭവം ശ്രദ്ധയില്‍ പെട്ടിട്ടുണ്ടന്നും ജനറേറ്റര്‍ പ്രവര്‍ത്തന സജ്ജമാക്കാന്‍  നടപടി സ്വീകരിച്ചതായും അധികൃതര്‍ പറഞ്ഞു.