ഐപിഎൽ തുടങ്ങാൻ ദിവസങ്ങൾ മാത്രം ബാക്കിനിൽക്കെ പഞ്ചാബ് കിങ്‌സ് ഓപ്പണർ പ്രിയാൻഷ് ആര്യയെ പ്രശംസിച്ച് മുൻ ഇന്ത്യൻ താരം മുരളി വിജയ്. മൂന്ന് ഫോർമാറ്റിലും താരമാവാനുള്ള കഴിവ് പ്രിയാൻഷ് ആര്യക്കുണ്ടെന്നാണ് മുരളി വിജയ് പറഞ്ഞത്. 

''പ്രിയാൻഷ് ആര്യ വളരെ രസകരമായ ഒരു വ്യക്തിയാണ്. ഒരു മികച്ച താരമാവാനുള്ള എല്ലാ കഴിവും അവനുണ്ട്. ഏഴ് മുതൽ 15 ഓവർ വരെ സ്പിന്നർമാരെ നേരിടാനുള്ള കഴിവ് വളരെ പ്രധാനപ്പെട്ടതാണ്. ടി-20യിൽ ഏറ്റവും ബുദ്ധിമുട്ട് നേരിടുന്ന ഘട്ടമാണിത്. എന്നാൽ എല്ലാ മേഖലയിലും ആധിപത്യം പുലർത്താൻ കഴിവുള്ള ഇടം കയ്യൻ ബാറ്റർ എന്ന നിലയിൽ പ്രിയാൻഷ് ആര്യ അത് നന്നായി ചെയ്യുന്നുണ്ട്. എല്ലാ ഫോർമാറ്റുകളിലെയും താരമാവാനുള്ള കഴിവ് അവനുണ്ടെന്ന് ഞാൻ വിശ്വസിക്കുന്നു'' മുരളി വിജയ് പറഞ്ഞു. 

2025 ഐപിഎല്ലിൽ പഞ്ചാബ് കിങ്സിനായി മിന്നും പ്രകടനം നടത്തി ശ്രദ്ധ നേടിയ താരമാണ് പ്രിയാൻഷ് ആര്യ. തന്റെ അരങ്ങേറ്റ ഐപിഎൽ സീസണിൽ തന്നെ 475 റൺസ് ആണ് താരം അടിച്ചെടുത്തത്. ചെന്നൈ സൂപ്പർ കിങ്സിനെതിരെ പ്രിയാൻഷ് ആര്യ സെഞ്ച്വറി നേടിയും തിളങ്ങിയിരുന്നു. ചെന്നൈക്കെതിരെ പ്രിയാൻഷ് 42 പന്തിൽ ഏഴ് ഫോറും ഒൻപത് സിക്സുമടക്കം 103 റൺസ് ആണ് നേടിയത്.

ഐപിഎൽ ചരിത്രത്തിൽ ഒരു ഇന്ത്യക്കാരന്റെ ഏറ്റവും വേ​ഗതയേറിയ രണ്ടാമത്തെ സെഞ്ച്വറി ആയിരുന്നു ഇത്. 39 പന്തിൽ നിന്നുമാണ് താരം സെഞ്ച്വറി പൂർത്തിയാക്കിയത്. 37 പന്തിൽ നിന്നും സെഞ്ച്വറി നേടിയ യുസഫ് പത്താനാണ് ഈ റെക്കോർഡിൽ ഒന്നാം സ്ഥാനത്തുള്ളത്. ഇതിനു പുറമെ ഒരു അൺക്യാപ് താരം നേടുന്ന ഏറ്റവും വേ​ഗതയേറിയ സെഞ്ച്വറി കൂടിയാണിത്.