കൊല്ലം: ഇ.എസ്.ഐ ഗുണഭോക്താക്കള്‍ക്ക് നിലവില്‍ ലഭിച്ചു കൊണ്ടിരിക്കുന്ന സൂപ്പര്‍ സ്‌പെഷ്യാലിറ്റി ചികിത്സാ സൗകര്യങ്ങള്‍ നിഷേധിക്കുന്ന ഉത്തരവ് പിന്‍വലിക്കണമെന്നും ഉത്തരവ് നടപ്പാക്കുന്നത് അടിയന്തിരമായി നിര്‍ത്തി വയ്ക്കണമെന്നും ആവശ്യപ്പെട്ട് എന്‍.കെ. പ്രേമചന്ദ്രന്‍ എം.പി കേന്ദ്ര തൊഴില്‍ വകുപ്പ് മന്ത്രി, തൊഴില്‍ വകുപ്പ് സെക്രട്ടറി, ഇ.എസ്.ഐ ഡയറക്ടര്‍ ജനറല്‍ എന്നിവര്‍ക്ക് കത്ത് നല്‍കി. ഉത്തരവ് മനുഷ്യത്വരഹിതവും തൊഴിലാളിദ്രോഹവുമാണ്. കശുവണ്ടി തൊഴിലാളികള്‍ ഉള്‍പ്പെടെ ബഹുഭൂരിപക്ഷം വരുന്ന  ഇ.എസ്.ഐ ഗുണഭോക്താക്കള്‍ക്ക് ദോഷകരമായ ഉത്തരവാണിതെന്നും  ഇത്  ഇ.എസ്.ഐ യുടെ അടിസ്ഥാന തത്വത്തിനും ലക്ഷ്യത്തിനും  ഘടക വിരുദ്ധമാണെന്നും എം.പി പറഞ്ഞു.