ജറുസലേം: ഗസയിലെ വൈദ്യുതി വിതരണം നിർത്താൻ നിർദേശം നൽകിയതായി ഇസ്രാഈൽ വൈദ്യുതി മന്ത്രി എലി കോഹൻ. വൈദ്യുതി വിഛേദിക്കുന്നതിനുള്ള ഉത്തരവിൽ താൻ ഒപ്പുവെച്ചിട്ടുണ്ടെന്ന് അദ്ദേഹം വ്യക്തമാക്കി. കഴിഞ്ഞ ഒരു ആഴ്ചയായി യുദ്ധത്തിൽ തകർന്ന ഫലസ്തീനിലേക്കുള്ള എല്ലാ സഹായങ്ങളും ഇസ്രാഈൽ തടഞ്ഞുവെച്ചിരിക്കുകയാണ്. ഈ സാഹചര്യത്തിലാണ് വൈദ്യുതി വിതരണം പൂർണമായും നിർത്താൻ ഇസ്രാഈൽ തീരുമാനം എടുത്തത്.

"ഗസയിലെ വൈദ്യുതി വിതരണത്തിനുള്ള കണക്ഷൻ വിചേദിക്കാൻ ഉത്തരവ് നൽകിയിട്ടുണ്ട്. ബന്ദികളായ ഇസ്രാഈൽ പൗരന്മാരെ തിരികെ കൊണ്ടുവരാനുള്ള എല്ലാ ശ്രമങ്ങളും നടത്തും. കൂടാതെ, യുദ്ധം അവസാനിക്കുമ്പോൾ ഹമാസ് പൂർണമായും ഇല്ലാതാകുമെന്ന് ഉറപ്പാക്കും," എന്ന് എലി കോഹൻ പറഞ്ഞു.

15 മാസമായി നീണ്ടുനിൽക്കുന്ന യുദ്ധത്തിൽ വെടിനിർത്തൽ നിലവിൽ പ്രഖ്യാപിച്ചിരിക്കുകയാണ്. ഇതിനെ നീട്ടുന്നതിനായി ഇസ്രാഈൽ മാർഗനിർദേശങ്ങൾ മുന്നോട്ട് വെച്ചിട്ടുണ്ട്. എന്നാൽ, ഫലസ്തീൻ അതിനോട് പൂർണമായും യോജിപ്പില്ല. മാർച്ച് ഒന്നിനാണ് വെടിനിർത്തലിന്റെ ആദ്യ ഘട്ടം അവസാനിച്ചത്. അതിനെ ഏപ്രിൽ പകുതിയിലേക്ക് നീട്ടണമെന്നാണ് ഇസ്രാഈലിന്റെ ആവശ്യം. എന്നാല്‍, യുദ്ധം പൂർണമായും അവസാനിക്കുന്ന നടപടിയിലേക്ക് എത്തണം എന്നാണ് ഹമാസിന്റെ ആവശ്യം.

ഹമാസ് തിങ്കളാഴ്ചയോടെ ബന്ദികളെ വിട്ടയക്കിയില്ലെങ്കിൽ അതിന് വലിയ പ്രത്യാഘാതങ്ങൾ ഉണ്ടാകുമെന്ന് ഇസ്രാഈൽ പ്രധാനമന്ത്രി ബെഞ്ചമിൻ നെതന്യാഹു മുന്നറിയിപ്പ് നൽകി. ഇസ്രാഈൽ യുദ്ധക്കുറ്റം ചെയ്യുകയാണെന്നും, ബന്ദികളായ ഇസ്രാഈൽ പൗരന്മാരെയും സഹായ വിതരണം തടഞ്ഞത് ബാധിച്ചേക്കുമെന്നും ഹമാസ് പ്രതികരിച്ചു.

Israeli Electricity Minister Eli Cohen said he had ordered the power cut in Gaza. He said he had signed the order to cut off power.