വേറിട്ടു നില്‍ക്കുന്ന ഫോട്ടോകള്‍ സോഷ്യല്‍ മീഡിയയില്‍ പോസ്റ്റ് ചെയ്യുക എന്നത് ഇപ്പോഴത്തെ ഒരു രീതിയാണ്. അതിനായി എഡിറ്റ് ചെയ്ത് സ്വന്തം ഫോട്ടോ തനിക്ക് തന്നെ തിരിച്ചറിയാന്‍ കഴിയാത്ത രൂപത്തിലാക്കും ചിലര്‍. എഡിറ്റിങിനായി പല തരത്തിലുള്ള അപ്ലിക്കേഷനുകളും ഇപ്പോള്‍ ലഭ്യമാണ്. എന്നാല്‍ ഈ അടുത്തിടെയായി പുതിയൊരു ആപ്പ് പുറത്തിറങ്ങി. എല്ലാവര്‍ക്കും അത് ഒരുപാടങ്ങ് ബോധിച്ച മട്ടാണ്. പ്രിസ്മ എന്ന ഈ അപ്ലിക്കേഷനിലൂടെ നിങ്ങളുടെ സാധാരണ ചിത്രത്തെ അസാധാരണമാക്കാം.

കാമറയില്‍ പകര്‍ത്തുന്ന നിങ്ങളുടെ ചിത്രങ്ങളെ ഒരു പെയിന്റിങ് രൂപത്തിലേക്ക് പരിഷ്‌കരിക്കുകയാണ് പ്രിസ്മ ചെയ്യുന്നത്. ആപ്പിള്‍ സ്‌റ്റോറിലാണ് ആദ്യമായി പ്രിസ്മ പ്രത്യക്ഷപ്പെടുന്നത്. പിന്നീടത് സോഷ്യല്‍ മീഡിയയിലും തരംഗമായി. ഏതൊരു ബോറന്‍ ചിത്രത്തെ പോലും മികച്ച ഒന്നാക്കി മാറ്റാന്‍ സാധിക്കുന്നു എന്നത് തന്നെയാണ് പ്രിസ്മയുടെ വിജയവും.

ഒരു കൂട്ടം ഫില്‍ട്ടര്‍ ഓപ്ഷനുകളാണ് ഇതിനുള്ളിലുള്ളത്. വിശ്വാത ചിത്രകാരന്മാരുടെ ചിത്രങ്ങള്‍ പോലെ നിങ്ങളുടെ യഥാര്‍ഥ ചിത്രം മാറുന്നു. ഒരു കൂട്ടം ന്യൂറല്‍ നെറ്റ് വര്‍ക്കുകളും ആര്‍ട്ടിഫിഷ്യല്‍ ഇന്റലിജന്‍സുമാണ് സ്മാര്‍ട്‌ഫോണില്‍ എടുക്കുന്ന സാധാരണ ചിത്രങ്ങളെ വ്യത്യസ്ഥമാക്കുന്നത്. ഏതായാലും പോക്കിമോന്‍ ഗെയിമിനെ പോലെ തന്നെ ജനങ്ങള്‍ പ്രിസ്മയെയും അങ്ങ് ജനകീയമാക്കിയിട്ടുണ്ട്‌