തൊടുപുഴ: നഗരമധ്യത്തിലെ ശ്രീകൃഷ്ണക്ഷേത്രത്തിലെ ഉത്സവത്തിനിടയില്‍ ആന ഇടഞ്ഞത് പരിഭ്രാന്തി പരത്തി. ഇന്നലെ വൈകിട്ട് ആറരക്ക് കാഴ്ച ശീവേലി  എഴുന്നള്ളിപ്പിനു ശേഷം തളക്കാനായി ക്ഷേത്രത്തിന്റെ സമീപത്തെ കൃഷ്ണതീര്‍ത്ഥം ഓഡിറ്റോറിയത്തിന്റെ കോമ്പൗണ്ടില്‍ എത്തിയപ്പോഴാണ് ഊട്ടോളി ഗജേന്ദ്രന്‍ എന്ന ആന ഇടഞ്ഞത്. ഒന്നാം പാപ്പാനെ ആന ആക്രമിച്ചു.
ഇദ്ദേഹത്തെ  പരുക്കുകളോടെ ആശുപത്രിയില്‍ പ്രവേശിപ്പിച്ചു. തുടര്‍ന്ന് ആന മുന്നോട്ട് നീങ്ങി അവിടെ പാര്‍ക്ക് ചെയ്തിരുന്ന കാര്‍ തള്ളാന്‍ ശ്രമിച്ച ശേഷം പിന്തിരിയുകയായിരുന്നു. തുടര്‍ന്ന് രണ്ടാം പാപ്പാന്‍  വാലില്‍ പിടിച്ച് ആനയെ നിയന്ത്രിച്ചു നിര്‍ത്തുകയായിരുന്നു.
മണിക്കൂറുകള്‍ നീണ്ട പരിശ്രമത്തിനൊടുവില്‍ രാത്രി ഒന്‍പതു മണിയോടെ രണ്ടാം പാപ്പാന്റെ നേതൃത്വത്തില്‍ വടം ഉപയോഗിച്ചു കെട്ടി തളക്കുകയായിരുന്നു. കോട്ടയത്തുള്ള മയക്കുവെടി വിദഗ്ധരെ വിവരമറിയച്ചിരുന്നു. എന്നാല്‍ അവര്‍ എത്തുന്നതിനു മുമ്പ് തന്നെ ആനയെ തളച്ചു. സംഭവസ്ഥലത്ത് ഡിവൈ.എസ്.പി: എന്‍.എന്‍. പ്രസാദ്, സി.ഐ: ശ്രീമോന്‍, എസ്.ഐ: ജോബിന്‍ ആന്റണി, ഫയര്‍ഫോഴ്‌സ് സംഘം, എലിഫന്റ് സ്‌ക്വാഡ് എന്നിവര്‍   ക്യാമ്പ് ചെയ്തു.