തിരൂര്‍: തിരൂര്‍- വൈരങ്കോട്- പുത്തനത്താണി റൂട്ടിലോടുന്ന 12 സ്വകാര്യ ബസുകള്‍ ഒരു ദിവസത്തെ വരുമാനം  ടിപ്പര്‍ലോറികള്‍ കൂട്ടിയിടിച്ച് പരുക്കേറ്റ് കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയില്‍ കഴിയുന്ന യുവാവിന്റെ ചികിത്സയ്ക്ക് നല്‍കി.
കഴിഞ്ഞ 16ന് വൈലത്തൂരില്‍ അപകടത്തില്‍പ്പെട്ട പുത്തനത്താണിയില്‍ വാടകയ്ക്ക് താമസിക്കുന്ന മുഹമ്മദ് അനസിന്റെ  (25) തുടര്‍ചികിത്സയ്ക്കായാണ് ബസ് ഉടമകളും ജീവനക്കാരും ഒരു ദിവസത്തെ വരുമാനം കാരുണ്യമായി നല്‍കിയത്. അല്‍ അമീന്‍, ദര്‍ബാര്‍, മുബാരിസ്, ഷിഫാന, ഷഹബാന്‍, മര്‍ജാന്‍, റെയിന്‍ബോ, ഓണ്‍ലൈന്‍ തുടങ്ങിയ ബസുകളാണ് വരുമാനം അനസിന്റെ ചികിത്സാ ചെലവിന് നല്‍കിയത്.
ഇരുകാലുകളുടെയും തുടയെല്ല് പൊട്ടിയ അനസിന്റെ ഓപ്പറേഷനായി നാലരലക്ഷം രൂപ ചെലവുവരുമെന്നാണ് ആശുപത്രി അധികൃതര്‍ ബന്ധുക്കളെ അറിയിച്ചിരിക്കുന്നത്.
ഈ സാഹചര്യത്തിലാണ് അനസിനെ സ്വകാര്യ ആശുപത്രിയിലേക്ക് മാറ്റി എത്രയും വേഗം ഓപ്പറേഷന്‍ നടത്താന്‍ ബന്ധുക്കളും നാട്ടുകാരും സഹപ്രവര്‍ത്തകരും ചേര്‍ന്ന് ശ്രമമാരംഭിച്ചിരിക്കുന്നത്. അനസ് നേരത്തെ ഈ റൂട്ടിലൂള്ള സ്വകാര്യ ബസുകളില്‍ ഡ്രൈവറായി ജോലി ചെയ്തിരുന്നു.