നീലേശ്വരം: പാലായി റഗുലേറ്റര്‍ കം ബ്രിഡ്ജിന്റെ പണി പുരോഗമിക്കുന്നു. കയ്യൂര്‍-ചീമേനി പഞ്ചായത്തിനെയും നീലേശ്വരം നഗരസഭയെയും തമ്മില്‍ ബന്ധിപ്പിക്കുന്ന തേജസ്വിനി പുഴയില്‍ താം കൈ കടവിലാണ് റഗുലേറ്റര്‍ കം ബ്രിഡ്ജ് പണിയുന്നത്. കഴിഞ്ഞ ഒക്ടോബറിലാണ് ഇതിന്റെ തറക്കല്ലിടല്‍ കര്‍മം മുഖ്യമന്ത്രി പിണറായി വിജയന്‍ നിര്‍വഹിച്ചത്. പുഴയുടെ ഇരുഭാഗങ്ങളിലും തൂണുനിര്‍മാണത്തിനുള്ള പൈലിങ് ജോലിയാണ് രാവും പകലും നൂറിലധികം തൊഴിലാളികള്‍ ചേര്‍ന്നെടുക്കുന്നത്.
ഇരുകരകളിലും കരിങ്കല്‍ ഭിത്തി കെട്ടുന്ന ജോലിയും ആരംഭിച്ചു. 17 സ്പാനുകളും പാലത്തിനടിയില്‍ കൂടി ബോട്ടുകള്‍ കടന്നുപോകുമ്പോള്‍ ഓട്ടോമാറ്റിക്കായി തുറക്കുന്ന ലോക്ക് ചേമ്പറുമുണ്ടാകും.65 കോടി രൂപ ചെലവില്‍ നബാര്‍ഡിന്റെ സഹായത്തോടെയാണ് ഇറിഗേഷന്‍ വകുപ്പിന്റെ ജില്ലയിലെ ഏറ്റവും വലിയ പദ്ധതി നടപ്പാക്കുന്നത്. ഏറണാകുളത്തെ പൗലോസ് ജോര്‍ജ് കമ്പനിയാണ് പദ്ധതിയുടെ കരാറുകാര്‍. പദ്ധതി യാഥാര്‍ഥ്യമാകുന്നതോടെ 4500 ഹെക്ടര്‍ സ്ഥല് കൃഷിയിറക്കാനാകും.