ബെംഗളൂരു: സംസ്ഥാന പബ്ലിക് സര്‍വീസ് കമ്മീഷന്‍ (പിഎസ്‌സി) റാങ്ക് ലിസ്റ്റില്‍ സ്വന്തം മക്കളെ അവിഹിതമായി ഉള്‍പ്പെടുത്തിയ സംഭവത്തില്‍ കര്‍ണാടക പിഎസ്‌സി ചെയര്‍മാന്‍ ശിവശങ്കരപ്പ എസ്. സഹുകറിനെ ഗവര്‍ണര്‍ സ്ഥാനത്തുനിന്ന് സസ്‌പെന്‍ഡ് ചെയ്തു. വിഷയത്തില്‍ കൂടുതല്‍ അച്ചടക്ക നടപടികള്‍ക്കായി കേസ് സുപ്രിം കോടതിയുടെ പരിഗണനയ്ക്ക് വിടാന്‍ രാഷ്ട്രപതിയോട് ഗവര്‍ണര്‍ ശുപാര്‍ശ ചെയ്തിട്ടുമുണ്ട്.

ഇന്‍ഡസ്ട്രിയല്‍ എക്സ്റ്റന്‍ഷന്‍ ഓഫിസര്‍ തസ്തികയിലേക്കുള്ള ഉദ്യോഗാര്‍ഥികളുടെ പട്ടികയിലാണ് ചെയര്‍മാന്‍ തന്റെ മക്കളായ സുമ, അനുരാധ എന്നിവരെ തിരുകിക്കയറ്റിയത്. ഇതില്‍ സുമയെ സംവരണ വിഭാഗത്തിലും അനുരാധയെ ജനറല്‍ കോട്ടയിലുമാണ് ഉള്‍പ്പെടുത്തിയിരുന്നത്. എന്നാല്‍, സംവരണ ആനുകൂല്യം നേടിയെടുക്കാനായി സുമ 40,000 രൂപ മാത്രം വാര്‍ഷിക വരുമാനമുള്ള വ്യാജ സര്‍ട്ടിഫിക്കറ്റാണ് സമര്‍പ്പിച്ചതെന്ന് പിഎസ്‌സി അസിസ്റ്റന്റ് സെക്രട്ടറി കണ്ടെത്തുകയായിരുന്നു. ഇതേത്തുടര്‍ന്ന് സെക്രട്ടറിയുടെ പരാതിയില്‍ പൊലിസ് കേസെടുത്ത് അന്വേഷണം ആരംഭിച്ചു.

പിഎസ്‌സി നിയമനങ്ങളിലെ ഈ ക്രമക്കേടിനെക്കുറിച്ച് സമഗ്രമായ അന്വേഷണം വേണമെന്ന് ആവശ്യപ്പെട്ട് കേന്ദ്രമന്ത്രി പ്രഹ്ലാദ് ജോഷി ഗവര്‍ണര്‍ക്കും മുഖ്യമന്ത്രിക്കും കത്തയച്ചിരുന്നു. തുടര്‍ന്നുണ്ടായ കര്‍ശനമായ അന്വേഷണത്തിലാണ് ചെയര്‍മാന്റെ തട്ടിപ്പുകള്‍ വെളിച്ചത്തായത്. വിവാദങ്ങളെ തുടര്‍ന്ന് കമ്മീഷന്‍ യോഗങ്ങളില്‍ പങ്കെടുക്കുന്നതില്‍ നിന്ന് ഇദ്ദേഹത്തെ നേരത്തെ വിലക്കിയിരുന്നു. അതിനിടെ, ചെയര്‍മാന്റെ രാജി ആവശ്യപ്പെട്ട് കമ്മീഷന്‍ പാസാക്കിയ പ്രമേയം ഹൈക്കോടതി താല്‍ക്കാലികമായി സ്റ്റേ ചെയ്തിരിക്കുകയാണ്.

The Governor of Karnataka suspended the State PSC Chairman, Shivashankarappa S. Sahukar, for illegally putting his daughters on the Industrial Extension Officer rank list using a fake income certificate.