ചെമ്മാട്: ദാറുല്‍ഹുദാ ഇസ്‌ലാമിക സര്‍വകലാശാലയില്‍ അത്യാധുനിക സൗകര്യത്തോടെ സജ്ജീകരിച്ച റെക്കോര്‍ഡിങ് സ്റ്റുഡിയോയുടെ ഉദ്ഘാടനം ദാറുല്‍ഹുദാ നാഷനല്‍ പ്രൊജക്ട് ചെയര്‍മാനും സെനറ്റ് അംഗവുമായ പാണക്കാട് സയ്യിദ് മുനവ്വറലി ശിഹാബ് തങ്ങള്‍ നിര്‍വഹിച്ചു. പ്രതിസന്ധികളെ അനുകൂലമാക്കി, വിദ്യാഭ്യാസ രംഗത്തും പ്രബോധന മേഖലയിലും പുതിയ കാല്‍വെപ്പുകള്‍ നടത്തേണ്ടതുണ്ടെന്ന് അദ്ദേഹം പറഞ്ഞു. ഏതു മേഖലയില്‍ തകര്‍ച്ച നേരിട്ടാലും വിദ്യാഭ്യാസരംഗത്തെ പ്രതിസന്ധിയിലാക്കരുതെന്ന്  അദ്ദേഹം പറഞ്ഞു.

വൈസ് ചാന്‍സലര്‍ ഡോ. ബഹാഉദ്ദീന്‍ മുഹമ്മദ് നദ്‌വി അധ്യക്ഷനായി. ക്യാമറകളുടെ സ്വിച്ച് ഓണ്‍ കര്‍മവും അദ്ദേഹം നിര്‍വഹിച്ചു. ദാറുല്‍ഹുദായുടെ ഓണ്‍ലൈന്‍ വിദ്യാഭ്യാസം, ട്രെയ്‌നിങ് പരിപാടികള്‍, വീഡിയോ കോണ്‍ഫറന്‍സിങ്, ഓണ്‍ലൈന്‍ കോഴ്‌സുകള്‍, പ്രബോധന പരിപാടികള്‍ തുടങ്ങിയ വിവിധ പദ്ധതികള്‍ ലക്ഷ്യമാക്കി നിര്‍മിച്ച സ്റ്റുഡിയോ സ്‌പോണ്‍സര്‍ ചെയ്തത് പൂര്‍വ വിദ്യാര്‍ത്ഥി സംഘടന ഹാദിയയുടെ യു.എ.ഇ ചാപ്റ്ററാണ്. 

ചടങ്ങില്‍ യു. ശാഫി ഹാജി ചെമ്മാട് സ്വാഗതവും പി.കെ നാസര്‍ ഹുദവി കൈപ്പുറം നന്ദിയും പറഞ്ഞു. എം.കെ ജാബിറലി ഹുദവി, ഇസ്ഹാഖ് ബാഖവി ചെമ്മാട്, ഡോ. സുബൈര്‍ ഹുദവി ചേകനൂര്‍, ടി. അബൂബക്കര്‍ ഹുദവി, ഹംസ ഹാജി മൂന്നിയൂര്‍, പി.കെ മുഹമ്മദ് ഹാജി, സി.കെ മുഹമ്മദ് ഹാജി, സിദ്ദീഖ് ഹാജി ചെറുമുക്ക്, കെ.പി ശംസുദ്ദീന്‍ ഹാജി, ഇ.കെ റഫീഖ് ഹുദവി കാട്ടുമുണ്ട, ഫൈസല്‍ ഹുദവി പടിക്കല്‍  സംബന്ധിച്ചു.