മുവാറ്റുപുഴ: നിരപ്പ് ഒഴു പാറയില്‍ പ്രവര്‍ത്തിക്കുന്ന കന്നത്താന്‍ ചിപ്പ് ബോര്‍ഡ് കമ്പനിയിലെ കയറ്റി ഇറക്കുമായി ബന്ധപ്പെട്ട് തദ്ദേശീയരായ തൊഴിലാളികള്‍ നടത്തിവരുന്ന സമരം എ.ഐ.ടി.യു.സി മുവാറ്റുപുഴ മണ്ഡലം കമ്മറ്റി എറ്റെടുക്കുന്നു. ഇതിന്റെ ഭാഗമായി നാളെ മുതല്‍ കമ്പനിക്ക് മുന്നില്‍ അനിശ്ചിത കാല സത്യാഗ്രഹം ആരംഭിക്കുമെന്ന് മണ്ഡലം പ്രസിഡന്റ് കെ.എ നവാസും, സെക്രട്ടറി ഇ.കെ സുരേഷും അറിയിച്ചു.
കഴിഞ്ഞ രണ്ട് മാസ കാലമായി ഒഴു പാറ ചുമട്ട് തൊഴിലാളി യൂനിയന്റെ നേതൃത്വത്തില്‍ നടത്തിവരുന്ന സമരം ഗുണ്ടകളെയും പൊലിസിനെയും ഉപയോഗിച്ച് സമരം തകര്‍ക്കാനുള്ള നീക്കത്തെതുടര്‍ന്നാണ് സമരം ശക്തമാക്കാന്‍ മണ്ഡലം കമ്മറ്റി തീരുമാനിച്ചത്.
25 മുതല്‍ കമ്പനിക്ക് മുന്നില്‍ യുനിയന്‍ നേതാക്കന്‍മാര്‍ ആരംഭിക്കുന്ന അനിശ്ചിതകാല സത്യാഗ്രഹം എ.ഐ.റ്റി.യു.സി. സംസ്ഥാന ജനറല്‍ സെക്രട്ടറി കെ.പി.രാജേന്ദ്രന്‍ ഉദ്ഘാടനം ചെയ്യും. ഒഴു പാറയില്‍ ചേര്‍ന്ന സമര സഹായസമിതി യോഗം എല്‍ദോ എബ്രാഹം എം.എല്‍.എ ഉദ്ഘാടനം ചെയ്തു.
പി.കെ ബാബുരാജ്, കെ.എ നവാസ്. കെ.എ സനീര്‍, വി.എം നവാസ്, എം.വി സുഭാഷ്, പി.വി ജോയി, സീന ബോസ്, ഇബ്രാഹിം മു ളാട്ട് എന്നിവര്‍ പ്രസംഗിച്ചു.