തിരുവനന്തപുരം: പനത്തുറ ക്ഷേത്രോത്സവത്തിനിടെ യുവാവിനെ കുത്തിപ്പരിക്കേൽപ്പിച്ച സംഭവത്തിൽ നാല് പ്രതികളെ തിരുവല്ലം പൊലിസ് പിടികൂടി. തിരുവല്ലം സ്വദേശികളായ അഖിൽ, അഖിലാശ്, രഞ്ജിത്ത്, നന്ദു എന്നിവരാണ് പിടിയിലായത്. ആക്രമണത്തിൽ ഗുരുതരമായി പരിക്കേറ്റ പൂങ്കുളം സ്വദേശി സുജിത്ത് സ്വകാര്യ ആശുപത്രിയിൽ ചികിത്സയിലാണ്.

സംഭവം ഇങ്ങനെ:

ഞായറാഴ്ച രാത്രി പനത്തുറ ക്ഷേത്രത്തിലെ ഉത്സവത്തിനിടെയാണ് സംഭവം നടന്നത്.ഒന്നാം പ്രതിയായ അഖിലും പരിക്കേറ്റ സുജിത്തിന്റെ സഹോദരനും തമ്മിൽ നേരത്തെയുണ്ടായിരുന്ന മുൻവൈരാഗ്യമാണ് ആക്രമണത്തിൽ കലാശിച്ചത്.ഉത്സവപ്പറമ്പിൽ വെച്ചുണ്ടായ തർക്കത്തെ തുടർന്നുണ്ടായ കയ്യാങ്കളിയിൽ സുജിത്തിന് വയറിന് കുത്തേൽക്കുകയായിരുന്നു.

സംഭവത്തിന് ശേഷം ഒളിവിൽ പോയ പ്രതികളെ തിരുവല്ലം പൊലിസ് പിന്തുടർന്ന് പിടികൂടുകയായിരുന്നു. കേസിൽ ഉൾപ്പെട്ട മൂന്നാം പ്രതി അക്ഷയ് നിലവിൽ ഒളിവിലാണ്. ഇയാൾക്കായി പൊലിസ് തിരച്ചിൽ ഊർജ്ജിതമാക്കിയിട്ടുണ്ട്. ഉത്സവ നഗരിയിൽ ഭീതി പടർത്തിയ അക്രമികൾക്കെതിരെ ശക്തമായ വകുപ്പുകൾ ചുമത്തിയാണ് പൊലിസ് കേസെടുത്തിരിക്കുന്നത്.